AMPATI: South West Garo Hills a·jao bilsi 16 ong·gipa me·tra saksako kragija dake dokanina police-rang, mande saksako rim·aha.
Koborko on·ani gitade, ia a·sel ong·ani re·anggipa Robibar salpaksachibara ong·aha aro police-rang, Robibar walosa FIR-ko man·soaha.
Dokako man·e ia me·tra, bilongbee saknaanirangko man·ahani gimin ia me·trako ta·raken Garobadha PHC-ona ra·angaha aro ja·mano uko nambate sanna gita Tura-ni Holy Cross Hospital-ona ra·angaha.
Indake ong·engon, ia me·trako dokgipa mandeko police-rang rim·aha aro uko Mongolbar salo, kachario mikkangpaatgen ine South West Garo Hills a·jani Superintendent of Police (SP) Vikash Verma parakataha.
“Dos dakgipa mandeko chinga rim·aha aro Mongolbar salo uko kachariona ra·anggen. Ia me·trako drae til·ekanirang dongama dongja uko ma·sina gita chinga uni medical report-naba sengkuenga. Maini gimin ia me·trako dokahachim, ukoba chinga sandirokenga,” ine SP parakataha.