SHILLONG: Meghalaya a·dokni gitcham Governor Satya Pal Malik, Mongolbar salni 1:00 bajimango, New Delhi songjinmani Ram Manohar Lohia Hospital-o a·gilsakko watangaha. Ua bilsi 79 gape siangaha.
A·dokni gitcham Governor Satya Pal Malik, 1946 bilsini July 24 tariko, Uttar Pradesh a·dokni Baghpat songo atchiaha aro ua B.Sc aro LL.B degree-rangko, Meerut University-oni pass ka·aha.
Ua Bharatiya Kranti Dal-o nape, an·tangni politics-ni kamko a·bachengaha aro uni ja·man, Janata Dal, Indian National Congress, Lok Dal, Samajwadi Party, aro bon·kame Bharatiya Janata Party-o napangaha.
Sianggipa Satya Pal Malik, Uttar Pradesh Assembly, Rajya Sabha aro Lok Sabha-ni membor ong·eba dangdike on·angaha.
Ua dambonga a·dokrango, chong·motan Bihar, Odisha, Jammu & Kashmir, Goa aro Meghalaya a·dokoba Governor ong·e kamko ka·angaha.
Malik-ni sianina a·dokni Chief Minister Conrad K Sangma-ba kalimpaaniko parakataha.
“Satya Pal Malik, saksa mande namgipa aro Meghalaya a·dokni namroro silroroanina ka·oksia gnang kamko ka·gipa ong·achim. Uni ka·donggipa ong·ani, chanchianio rongtalani aro sorkarini dingtang dingtang kamrango uni bakrimanirangko chinga maming saloba sualjawa. Uni nokdangna kalimpaaniko on·anio angaba Meghalaya a·dokni manderang baksa bakrimenga. Uni janggi jringjrotnan tom·tomao neng·takchina,” ine Chief Minister Sangma, social media-o parakataha.
