TURA: South Garo Hills a·jani Chokpot Community Health Centre (CHC)-o doctor-rang dongrongjani a·selan jolo sagipa ding·gipa manderang sanna bananirangko ra·anio neng·nikanirangko chagrongna nangrongenga ine Chokpot Area Vigilance Committee (CAVC) parakatenba, ia CHC-na chu·onga gita doctor-rangko on·china sorkario dabiangaha.
“Chokpot CHC-o doctor-rangko man·rongani gimin chinga iachi jinmana u·iatna nangnikenga. Ia CHC-o sagipa ding·gipa manderang, sanna bananirangko nangchongmotani somoirangoba iandakgipa obostarangko chagrongna nangenga. Ia CHC-o doctor-rang dongjani a·selan sanna bananiko nangenggipa manderangko galchipe donako chinga an·tangtangan mikrontangchi nikaha. Ian changsa changgni ong·ja indiba pangnan ong·enggipa obosta ong·a,” ine CAVC-ni co-chairman Chamujar Ch Sangma parakataha.
CAVC-ni parakatani gitade, Chokpot CHC-o doctor-rang chu·ongjani gimin uamang changni chang, nangchakegipa official-rangna u·iatahachim indiba da·alonan iani bidingo maming ja·ku de·anirangko nikna man·kujaengachim.
Chokpot CHC-o doctor aro medical staff-ko chu·onga gita on·china manderang changni chang dabiengoba manderangni dabianirangko sorkari knachakna gisik nangjaenga ine matnangatengon, iandake Chokpot jolo manderangni mongsonggipa sanchakram biapon doctor-rang chu·ongjani a·sel songni nokni manderang, mongsongbate kangal cholgrirang neng·nikanirangko chagrongna nangtokenga ine CAVC parakataha.
“Ia health centre-o sanne bane on·gipa medical official-rangko chu·onga gita on·jaenganiara sorkarini kamo chu·sokgijaniko mesokasan ong·aigija manderangna an·seng baljoke dongna on·gimin bilko pe·ani gitaba ong·enga,” ine CAVC-ni co-chairman parakataha.
Chokpot CHC-o iandakgipa obostarangko nikna nangkuengani gimin suk ong·gijaniko parakatengon, ia health centre-na qualify ong·gipa doctor-rangko ta·raken on·china, doctor-rangni kam ka·anirangko nirokjringchina aro CHC-o kam ka·enggiparang kakket ong·e kam ka·ama ka·jaenga, ia pilakkon name nirokchina CAVC, a·dok sorkariko didiataha.
