SHILLONG: Garo Hills Autonomous District Council (GHADC)-o kam ka·enggiparangna ja 42 batpile dormaharangko on·na man·kujaengani gimin re·baenggipa 2026 bilsio ong·atna sienggipa GHADC election-o party-na ra·biani ong·gen ine National People’s Party (NPP) ku·rachakaha.
NPP-ni state working president aro a·dokni Cabinet Minister Marcuise N Marak-ni aganani gitade, GHADC-o kam ka·giparangna gitcham Executive Committee (EC)-rangonin dormaharangko bangki donrorobae da·o NPP-chi chalaienggipa EC-sa man·rikna gita nangskaengaha aro ian re·baenggipa GHADC election-o NPP-na nangchakeaniko ra·batelgen.
GHADC-o kam ka·enggipa manderangna ja 42 batpile dormaharangko on·na man·jaengani gimin dakchakanirangko on·china didie, dingtang dingtang dolrang aro Opposition MDC-rangba, a·dokni Governor-ko grongeahachim.
Iandake dormaharangko on·na man·jaengani gimin GHADC election-o NPP-ni kosako chakatanirang dongtelgen ine janapatengon, ia election-ni result-de, dingtang dingtang party-rangni candidate-rangko seokaniosa pangchakbatgen ine NPP-ni state working president aganskaaha.
GHADC election-o district council-o nangchakegipa dingtang dingtang kamrangni bidingo nakatatgen ine janapatengon, GHADC-ko mangrakbatatna aro manderangko NPP-o ka·dongatna gita NPP, rakbate kamrangko ka·na nanggen ine Marak aganaha.
GHADC election-na regional committee-ko songanichi aro namgipa candidate-rangko sandichina party-ni dilgiparangko ge·ete NPP, kamrangko ka·sona a·bachengaha ine nikna man·enga.
Cabinet-ko gital dake sualpiltaianio ukoba Cabinet-oniko ra·galani cholrang donga ine chanchichipenggipani bidingo sing·anina aganchakaniko on·angskaengon, ia pilakan a·dokni Chief Miniser-ni jakosa ong·aia aro ua an·tangde una je kamko on·na ukon ra·na kusi ong·aigen ine Marak parakataha.