SHILLONG: GHADC-o kam ka·giparangni batanggimin ja 42-onin dormahako man·kujaengani gimin jingjengatengon ia mamlako nirokatchina gita Cabinet Minister aro BJP dilgipa AL Hek, sorkariko mol·molaha.
Council-o kam ka·enggiparangni indita ru·uta somoirangonin dormahako man·gijaniara namen jajrengani ong·a, jagni-jagittam dormahako man·jaon manderang adita neng·nikarangko chagrongna nanga, indiba GHADC-o kam ka·giparangde batanggimin ja 42-onin dormahako man·kujaenga, uamangni janggi tangani baditan neng·nikao ong·enggen ine Hek aganaha.
“Uamang maidaken janggi tangenga aro maidakgipa obostarangko chagrongenga, iako u·ina man·pilja. Angni organisation-o kam ka·giparangni dormahako on·gija dongode iade kraa ong·ja.
Uandake GHADC-o Administrators Rule-ko ra·gatani gimin sing·aon Hek indine aganaha, “sorkari, ia mamlako nirokatna nanga aro kam ka·giparangni gimin chanchie ja·ku de·na nanga.
Dingtang dingtang political dolrang, Meghalaya-ni Governor-na ia mamlani bidingo u·iataha, aro mitamrang Governor-ko GHADC-o Administrators Rule-ko ra·gatchina mol·molaha. Iarangni gisepon mikkang bilsi ong·atnasigipa GHADC election-o dormahani bidingon National People’s Party (NPP)-na Garo Hills-o bilongen ra·biani ong·gen ine NPP ra·chakaha.
Garo Hills-o NPP-ni state working president in-charge Marcuise Marak, kobor ra·timgiparang baksa agangrikmitingo indine aganaha, “GHADC-o kam ka·giparangni dormahani bidingo, chingni party, dal·bea ra·bianirangko man·gen ine u·ienga, indiba ian skanggipa rikgipa Executive Committee -rangni chu·sokgijani a·selsa ong·enga, jekon NPP-chi dilenggipa EC man·rikaha.
GHADC-o tangka paisani bidingo neng·nikaniko chagrongengani obosta Governor-ni nachilona sokaha, maina dingtang dingtang political dolrang, ia mamlako nirokatchina Governor-ko mol·molaha.
Beben ia obostarang election-o nangchakegen indiba election-ni gimin agansona man·ja, party-ni candidate-rangko seokaosa pangchaka ine Marak aganaha.
