SHILLONG: Khasi aro Jaintia Hills-ona rel rama tariangna miksonganiko dingtang dingtang dolrang jegaltokengani gimin Mendipathar-ona dakanggipa rel ramako, East Garo Hills a·jani Williamnagar-ona bakrodapatskachina dabina tik ka·angaha.
Khasi aro Jaintia Hills a·jarango rel gari ra·anganiko nangnikjaenga ong·ode, Mendipathar-ona dakanggipa rel ramako East Garo Hills a·jaona bakrodapatskachina dabianggen ine a·dokni Cabinet Minister aro Williamnagar-ni MLA Marcuise N Marak parakataha.
“A·dokni salaramchipak rel garirangko nangnikjaenga ong·ode chinga Garo Hills-o rel ramako bakrodapatskachina dabigen,” ine Marak aganaha.
Williamnagar-ona rel ramarangko bakrodapataniara namgni ong·gen indiba South West Garo Hills a·jaonan rel ramarangko tariangna man·genchimode ian Garo Hills gimiknan, mongsongbate game ge·e cha·giparang bilongen namgni ong·batsranggen ineba Marak aganaha.
“Phulbari-oni Dhubri-ona Brahmaputra chibimako kabatenggipa dolongko matchotahaode, Garo Hills-ba bading chiwalanio nambatsranggipa biaprangoni damsa ong·gnok,” ine Cabinet Minister aganaha.
Mendipathar-oni Nongalbibra gita ba Tura, Tikrikilla ba Dalu gita Baghmara-ona rel ramako tariangchina mol·molenba adita salrangna skangsan sakgipin Cabinet Minister aro Rongara-Siju-ni MLA Rakkam A Sangma-ba a·dokni Chief Minister Conrad K Sangma-na memorandum-ko on·ahachim.
Da·o dipet Meghalaya a·doko, Guwahati-oni Mendipathar-ona dakanggipa rel ramasan dongkuaienga aro ia rel ramako taribaanichi, North Garo Hills a·jao bading chiwale aro game ge·e cha·enggipa manderang, bang·en namgnirangko man·engahachim.
Khasi aro Jaintia Hills a·jarangode, niam gri napsrukbagipa manderangna kenchakenba, dingtang dingtang dolrang, rel rama taribaaniko raken jegalsotokskaenga.