RESUBELPARA: Ma·gipa aro bi·sana an·seng-baljokaniko on·ani gimin ma·siataniko dakna gita Sombar salo North Garo Hills-ni Resubelpara Community Health Centre-o World Breastfeeding Week program-ko ong·atangaha.
Ia program-ona North Garo Hills-ni Additional Deputy Commissioner Y. W Momin mongsonggipa ong·e sokgipa ong·e bakko ra·aha, unbaksa District Medical & Health Officer Dr. P.S.R. Sangma aro Meghalaya State Rural Livelihoods Society (MSRLS)-ni Young Professional Food Nutritionist, ICDS ni Official-rang, ASHA aro AWW-rangba donpaaha.
Indake “Breastfeeding-A Mother’s Gift, A Baby’s Future” ine katta bichongko done ine programko ong·atangaha. Ia program-o District Immunization Officer, bi·sana sok kananio ma·gipanaba aro bi·sanaba namgniko man·ani gimin agan-talate on·angaha. Apsan salon Baby Show-koba ong·atangjole bi·sa bakgitchakna simsakani aro uamangni dal·roroanina mongsonggipa cha·ani ring·aniko on·na nangani giminba agan-skie on·angjolaha.
Apsandakgipa programko East Jaintia Hills district, Khliehriat Civil Hospital-oba World Breastfeeding Week-ko maniangaha jeon District Health Officer, atchigital bi·sana jadokona kingking sok kanna nangchongmotani gimin agan-skie on·angaha aro bi·sana sok kananiara bi·sako dal·roroatnasan ong·aija indiba bi·sa bakgitchakni signioniko komiata ine aganangaha.
