NPP-o MLA-rang sak 33 gapjok
SHILLONG: Adita salrangna skang mangmango party-oni ong·katgipa saksan mangmanggipa Congress-ni gitcham MLA Ronnie V. Lyngdoh Mongolbaro Chief Minister-ni bungalow-o chongipa tom·aniko ong·atao niamgita National People’s Party (NPP)-o napangaha.
Uko party-o rimnapna gita pilak dakna nanggnirangko dakmanaha aro uni gipin party-ona apjitangani gimin Speaker official gita ra·chakmanaha ine Lyngdoh parakaha.
Uni NPP-o napangani gimin kusi ong·chake una bang·arangan call ka·ataha aro mitamrangde jajaani kattarangkoba aganataha ine Lyngdoh aganaha.
Lyngdoh-ko rimchaksoanio jinmana aganprakengon, politics-ode bobil ong·kamani ba ripeng ong·kamani dongja, manderangna, a·dokna uandake a·songna on·kange kam ka·anisan baikamaigen ine Chief Minister aro NPP National President Conrad K. Sangma aganaha.
Lyngdoh-ni, NPP-ona re·baani gimin gitcham Mylliem MLA aro NPP dilgipa Hamletson Dohling a·bachengode jajaanirang dongahachim indaken ua una chakgiparang baksaba agangrikpilahachim, indiba ja·mano ian ian constituency-ni manderangna namgnisa ong·gnok ine chanchie ra·chakaha ine Conrad aganaha.
Congress-ni gitcham MLA Ronnie V Lyngdoh-ni National People’s Party (NPP)-o ja·napeani ja·man, 60-member Meghalaya Legislative Assembly-o NPP-ni bil da·o 33-ona sokangaha aro A·dokni itihaso ian darang political party-na bateba bil batgipa ong·engaha.
Ian A·dokni itihaso darang political party-na bate member bang·batgipa ong·aha ine Chief Minister Conrad K Sangma Mongolbaro aganaha.
Indake ong·genchimoba ian rasong chaani kattade ong·ja. Aro indake chanchigenchimode ian gualani ong·gen, membor bang·ahani gimin rakbate aro nambatesa kam ka·na nanggen ine Chief Minister aganaha.
“Politics-o jedakgipa obostarang ong·genchimoba an·ching pangna bamani dongna nanga aro an·tangtangko dal·nike ra·ani dongna nangja, politics-ode indakgipa bewalde kamona sokbaja” ineba Sangma aganaha.