TURA: Re·anggipa Robibar salpaksachibara, an·tangni nokdang baksa Sella Wario rona re·anggipa Ampati-ni Agriculture Officer Teseng M Sangma-ko Mongolbar saloba gittamgipa salna dingtang dingtang dolrang, songni manderang baksa salgimik chioniko sandibeahaoba man·pilkujaenga.
Ia mandeara, Araimile Police Station-ni ning·o donggipa Dolampong sambani MBOSE jolo sondongenggipa mande ong·achim aro uko chi man·pakangani somoio ua an·tangni nokdang baksa Sella Wario rona re·angahachim.
Indake ong·engon, Mongolbar pringnian Special Rescue Team (SRT), State Disaster Response Force (SDRF), Araimile Police Station-ni police-rang, songni manderang baksa ia mandeko sandina a·bachengtaiaha indiba rasong gribee ia gittamgipa saloba, uko man·piltaijaha.
Police-rangni u·iatani gitade, gittamgipa salo uko sandienggipa dolrang, Pelga Dare, Domesal Wari aro Waa Wari jolrangoniko sandiahachim indiba chu·sokgipa ong·jaha.
Ia a·sel ong·ani ja·man, chiringrangchi auna aro na·tok rim·na re·anggipa manderangna District Disaster Management Authority (DDMA)-ni gita mikrakatanirangko on·ataha.
Mikka waengmiting somoirango skatang chiringrangona re·angjachina mikrakataniko on·angengon, nokoni ong·katna skang pangnan IMD-ni mikrakatanirangko nichengchina, chiringrangona re·angon an·tangni miksongani aro re·bapilani somoirangko an·tangni ripengrangna ba nokdangna u·iatchina, chu tu·gipa, ro·ong rimilgipa aro a·a nom·gipa biaprangona re·angjachina, an·tangko balboatani bostu ba gananirangko ganchina, ja·pa rimilgijagipa ja·koprangko ganchina, saksan na·tok rim·jachina aro chu ringe milsi pejachina aro chi tu·ao jrojachina DDMA-ni official-rang u·iataha.