SHILLONG: Gari nokgiparang, jemangan bosturangko salruraana gita uamangni garirangko taridape jakalengachim, uamangni garirangkoko apsan skang gitan taripilchina gita Meghalaya Transport Department, Butbar salo sal sotdokna somoiko on·angaha. Sal 60 somoi on·mitingo taripiljaode Motor Vehicle Act-o dongimin niamo pangchake uamangni kosako ja·ku de·anggen ine sorkari mikrakataha.
Department-ni u·iatgipao janapani gitade, Authority-rangni maming ge·etani gri Light, Medium aro Heavy Vehicle uandakgipa bang·a garirangko garini ro·aniko, apalaniko aro chuaniko niamgri taridape jakkalenga.
Indake garirangko taridapenba jakkalenggiparangni kosako Motor Vehicle Act, 1988-ni Section 52 aro Central Motor Vehicle Rules, 1989-ni Rule 93-o pangchake u·iataniko on·enga ineba Department-oni parakataha.
Bang·a taridapgipa garirangan bosturang salanio garirangko bilgriata ine Senior Motor Vehicle Inspector aganaha. Trak garirangko nidikpile taridapanichi garini krimaniko batata aro rama gonggegiparango namen man·dikata, unigimin iandakgipa obostarangko nike, manderangna u·iataniara niamko ja·rikatanisan ong·aija mandeni janggina simsaksoani gitaba ong·a ine MVI aganangaha.
Unigimin taridapgimin garirangko skang gitan taripil·taichina gita garini nokgiparangna sal 60 somoiko on·angaha. Unigisepon sal somoi on·gimino tarijaode Motor Vehicle Act-ni niamrango pangchake manigijagipa gari nokgiparangni kosako ja·ku de·gen ineba Department mikrakataha.
