TURA: Re·anggipa Robibar salpaksachibara, Ganol chibimani Sella Wario chi man·anggipa mandeni manggisiko Budbar salo man·aha.
Ia mandeara, Ampati-o Sub-Divisional Agriculture Officer ong·e kam ka·enggipa Teseng M Sangma ong·achim aro ua Araimile Police Station-ni ning·o donggipa Dolampong sambani MBOSE jolo sondongenggipa mande ong·achim.
Robibar salo ua, an·tangni nokdang baksa Sella Wari jolo rona re·angahachim indiba rasong gribee, uko ua somoio ta·rakbegipa chi man·pakangaha aro untalan uko sandibeahaoba man·pilkujaengachim.
Uni gimaani ja·man State Disaster Response Force (SDRF), Special Rescue Team (SRT), Fire & Emergency Service, Police aro jolo songdongenggipa manderangba Robibar salonin, Sella Wari ka·ma jolrangoniko sandibeaha aro salgittamna uko sandiani ja·man brigipa salosa, uni manggisiko Banseng Wari samba joloniko man·aha.
Koborko on·ani gitade, ia mandeni manggisiko songni manderangsa nikchengaha aro ja·mano uamang police-rangna u·iatskaaha.
Ia manggisiko man·gipa biapara, gari man·gipa ramaoni bewalan chel·a aro ian namen ga·nanggijagipa biapsa ong·ani gimin uni manggisiko ra·bapilanio sipai dolrang namen neng·nikanirangko man·aha ine u·iataha.
Batanggimin salrangonin mikkarang jimbee warongahani a·sel Ganol chibima namen ta·rakahachim aro ia mandeko sandianio sipai dolrang, neng·nikanirangko chagrongna nangaha.
