GHADC-na chamatgipa kajinarangni bidingo name talatchina dabia
TURA: Garo Hills Autonomous District Council (GHADC)-ni man·na nangenggipa kajinarangoni gong kror 120 tangkarangkon a·dok sorkari watatman·aha aro bangki dongkuenggipa grorangba gitcham Executive Committee (EC)-rangoni dongbagiminrangsa ong·a ine Chief Minister Conrad K Sangma-ni parakataniko Bristibar salo, Tura-ni MDC aro BJP-ni state vice president Bernard N Marak jegalatenba, iani bidingo manderangna nambate talataniko on·china dabiangaha.
Marak-ni parakatani gitade, GHADC-na gong kror 120 tangkarangko a·dok sorkari chame on·atmanaha aro da·o a·dok sorkarioni maming gro dongjaha ine badiaba news channel-rango Chief Minister-ni parakataniara GHADC-o kam ka·enggiparangna aro Garo Hills-ni manderangna jagokmanpilani gita ong·aha.
“NPP-ni Executive Committee-ko chalaichengaoni GHADC-o kam ka·giparangna 80 percent dormaharangkode on·manaha aro bangki dongkuenggipa grorangde gitcham EC-rangoni dongbaenggiparangsa ine na·a (CM) a·kangenga. Indiba iako anga gisik ra·atna nangnikenga, chong·motan batanggimin EC aro da·o ong·enggipa EC-koba NPP-chi chalaienga. GHADC-o kam ka·giparangni dormaha man·gnirangba NPP-chi chalaienggipa EC-ni ning·osa bariroroangaha. Una agreba, nang·ni kror 120 tangkarangko GHADC-na watatmanaha ine agananiara GHADC-o see rakkiani baksade namen dingtanggrika maina a·bachengo nang·ni sorkari kror 162-ko on·ataha ine a·kangengon, GHADC-ni record-ode gong kror 139-kosan mesokskaenga. Uni gimin manderangni jajaanirangko chel·atna gita badita tangkarangko mai bilsirangko watatahachim, uarangko name talatchina anga nang·ko mol·molenga,” ine Tura MDC parakataha.
GHADC-o kam ka·giparangni dormaharangko on·anio a·dok sorkaride daitorang dongja aro sorkarini kamde district council-rangna kajinarangko suale on·anisan ong·aia ine Chief Minister-ni agananiko jegalatskaengon, “Iandakesa kamrang ong·genchimode, na·simangni rim·ketna jotton ka·aoniko GHADC-ko jakgitel watchina aro autonomous council dake jakgitele chalaina on·china anga didienga,” ine Marak parakatenba, sorkarini jako ra·enggipa dingtang dingtang kamrang, jekai dingtang dingtang bosturangoniko kajina ra·ani, atchiani/sianiko biming segatani, tribal certificate aro gipin nangchongmotgipa certificate-rangko on·ani aro ANVC dolrang baksa songgigrikanio janapgimin ming 13 department-rangko GHADC-na pakwatskachina gita Tura MDC, a·dokni Chief Minister-ko didiataha.
Marak-ni parakatani gitade, 2015-2016 bilsini gisepo GHADC-ni namroro silroroanina gong kror 100.71 tangkarangko GHADC man·soahachim indiba ia project-rangoni bang·batakon ra·e kataha, mitam matchotjaha aro mitamko jakkalsretaha.