TURA: Garo Hills Autonomous District Council (GHADC)-o kam ka·enggipa manderang, ja 42 batpile dormaharangko man·kujaengani a·sel chaktokpikgija duk-mikchirangko chakna nangtokengaha ine United Democratic Party (UDP) Garo Hills region parakatenba, kam ka·giparangni dormaharangko on·na man·na gita ta·raken ja·kurangko de·china Meghalaya sorkari aro GHADC-ni Executive Committee-ko didiataha.
UDP Garo Hills region-ni youth general secretary Arman G Marak-ni parakatani gitade, GHADC-o kam ka·enggiparang ja 42 batpile dormaharangko man·tokkujaengani a·sel mitamrangde, nokdango sagipa ding·giparangko sanna bananio, dedrangni skul fee-rangko gamanio aro salantini nanga korosrangna namen neng·nikanirangko chakna nangtokengaha.
“Anga UDP Garo Hills region-ni youth general secretary ong·e, GHADC-o kam ka·enggipa manderangni ja 42 batpile dormaharangko man·kujaengani a·sel duk mikchirangko chakna nangengani gimin an·tangni duk chakpaaniko u·iatna nangnikenga. Ja 42 batpile dormaharangko man·kujaengani a·selan kam ka·giparangoni bang·batan nokdangtangtangko chalaianio neng·nikanirangko man·na nangtokengaha. Indita jani dormaharangko man·gija maikai nokdangko chalaina man·a ian chanchisokna amgijani ong·a,” ine Marak parakatenba, GHADC-o kam ka·enggipa manderangni neng·nikanirangko chel·chakna gita ta·raken ja·kurangko de·china a·dok sorkari aro NPP-chi chalaienggipa Executive Committee-ko didiataha.
GHADC-o kam ka·enggiparang an·tangtangni man·na nanggnirangkosa dabie da·alo jingjengatanirangko daktokenga ine janapatengon, “Hai an·ching uamangni saknaani aro duk mikchirangko nikja dake dongchajanaha aro uamangkoba mikkim gnang janggi tangpana cholko on·na,” ine UDP Garo Hills region-ni youth general secretary, ku·monganiko on·ataha.