SHILLONG: Khasi aro Jaintia Hills a·jarango rel gari ra·baaniko jegalsoenba, Garo Hills-ode mitam dilgiparang, rel garirangko ra·bachina aro rel ramarangko bakrodapatchina diditokskaengon, rel garirangko ra·baani bidingo maming ja·kurangko de·na skangba a·dok sorkari, manderangni nangnikanikosa nichenggen ine Bristibar salo, a·dokni Chief Minister Conrad K Sangma, gisik ra·atpiltaianiko on·angaha.
Khasi aro Jaintia Hills-ona rel rama tariangna miksonganiko dingtang dingtang dolrang jegaltokengani gimin Mendipathar-ona dakanggipa rel ramako, East Garo Hills a·jani Williamnagar-ona bakrodapatskachina dabianggen ine adita salrangna skangsan, a·dokni Cabinet Minister aro Williamnagar-ni MLA Marcuise N Marak parakatahachim.
Mendipathar-oni Nongalbibra gita ba Tura, Tikrikilla ba Dalu gita Baghmara-ona rel ramako tariangchina mol·molenba iana skang, sakgipin Cabinet Minister aro Rongara-Siju-ni MLA Rakkam A Sangma-ba a·dokni Chief Minister Conrad K Sangma-na memorandum-ko on·ahachim.
“Anga a·bachengonin iani bidingo tale aganmanaha. A·dokna namroro silroroaniko ra·bana gitade rel garirangko an·chingna nangchongmota. Ian Khasi Hills, Jaintia Hills ba Garo Hills-ba ong·ja maina, namroror silroroaninade rel garirangko nanga. Indiba apsan somoion, manderangni jajrengchakanirangba dongani gimin anga iani bidingo je ja·kuko de·na skangba manderang baksa agangrikchengna ba chanchirimchengna nangnikaniko parakmanaha,” ine Chief Minister, a·dokona rel garirangko ra·bana sorkari krengengkugenma ine sing·anina aganchakaniko on·aha.
Pilak political dolrangkon, an·tangtangni chanchianirangko dingtangatenba, rel garirangko ra·baani bidingo sorkarini songe on·gipa pilak party-rangni committee-ni tom·anio bak ra·echina gitaba Sangma didiataha.
Garo Hills-ni gipin biaprangonaba rel ramarangko bakrodapatchina MLA-rangni didigipani gimin janapatengon, “Oe chingni minister-rang angona re·bae, rel ramarangko tarina nanga ine aganeaha indiba angni agangimin gita anga maming ja·kuko de·na skangba, manderang baksa agangrikchenggen aro maiba neng·nikanirang donggenchimode, uarangni bidingo talatanirangko on·na jotton ka·gen. Ian Khasi-Jaintia Hills ba Garo Hills-oba ong·ja maina pilakon chinga apsan ja·kukon de·aigen,” ine Sangma aganaha.
South Garo Hills-ona rel ramarangko bakrodapatna gita survey ka·ani kamrangko a·bachengahama ine sing·on, da·o dipet maming kamrangkoba a·bachengkuja ine Chief Minister parakataha.
Rel project-ni bidingo chanchirimna gita sorkarini songe on·gipa committee-o Opposition dolrangni bakrimjana tik ka·ani gimin janapatskaengon, “Ia committee-ni tom·aniona re·bae bak ra·eanichide na·a rel gariko nangnikenga ine mesokenga ong·ja indiba ian chanchirimna songe on·gipa committee-san ong·aia. Kamrangko a·bachengani bidingo chanchirimna tom·anio bak ra·na sikjaenga ong·ode uamangni chanchianirangko dingtangatna nangenga. Chinga apsan chanchirimani cholkosa on·enga indiba uamang ia chanchirimanio bak ong·pana sikjaenga ong·ode anga mamingkoba agandapna nangani dongjawa. Uni gimin changsataie, anga pilak dolrangkon ia chanchirimanio bak ra·china mol·molatenga,” ine Chief Minister aganaha.