TURA: West Garo Hills a·jani Selsella-o donggipa PWD rama namsrangjahani gimin changni chang sorkarina u·iatahaoba maming aganchakani ba ja·ku de·chakatanirang dongjahani gimin Selsella jolrango songdongenggipa manderangni dakchakanichi, dingtang dingtang dolrangni nangrime bikotgipa All Selsella NGOs’ Alliance (ASNA), an·tangtangan ia ramako tarina a·bachengataha ine u·iataha.
Selsella PWD ramani obosta namsrangjahani a·sel manderang re·ruraanirango neng·nikanirangko chagrongna nangtokengani gimin jolo songdongenggipa manderangni dakchakanichi jolni NGO-rang, an·tangtangan ramko tarina a·bachengataha ine ASNA-ni dilgiparang parakataha.
“Ia rama namsrangjahani a·sel Selsella jolo songdongenggipa manderang bang·a neng·nikanirangko chagrongna nangtokenga aro janggi tanganioba neng·nikanirangko man·na nangenga. Ia ramako tarie on·china chinga changni chang Meghalaya sorkarina u·iatahaoba aro re·anggipa bilsio jinma re·jome dabianirangko dakahaoba maming aganchakaniko aro ja·ku de·chakaniko nikna man·jahani gimin chinga an·tangtangan ia ramako tarina a·bachengataha,” ine ASNA parakataha.
ASNA-ni parakatani gitade, ia ramako tarina gita dingtang dingtang NGO-rang aro jolo songdongenggipa manderang, an·tangtangan tangka paisarangkoba gilgrimaha.
India a·songna an·tangtangni daito aro ka·saaniko mesokna gita ia ramako uamang, re·baenggipa August-ni 15 tariko a·songni jakgitelaniko manina skangan matchotatna miksongenga ineba ASNA-ni dilgiparang parakataha.
“Sorkari, an·tangni daitoko chu·sokatna man·jaenga ong·ode manderang chu·sokatskagen,” ine ASNA parakataha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO, ANYO, GSMC aro ACHIK dolrang bakrimengachim ine nikna man·a.
Selsella ramako sorkari tarichipjani gimin manderang an·tangtangan tarienga
Date:
Share post:
