BAGHMARA: Bristibar salo, South Garo Hills a·jani District Legal Services Authority (DLSA), National Legal Services Authority (NALSA)-ni Victims of Trafficking & Commercial Sexual Exploitation scheme-ni bidingo talatanirangko on·na gita dingtangmancha awareness program-ko Baghmara-ni Rangku Memorial Girls Secondary School-o ong·atangaha.
Ia program-o skie on·gipa official-rang, chong·motan Para Legal Lawyer Parmoy R Marak aro Baghmara DLSA-ni Assistant Legal Aid Counsel Arnosh Cheang Sangma, skulo poraienggipa chatro chatrirangna aganprakengon, ainni gita dakchakanirangko ra·ani, palsrukako ba kal·akako man·gipa manderangna on·gimin bil aro dingtang dingtang dakchakani cholrangni bidingo agan-talatanirangko on·angaha.
Ia awareness program-ko ong·atani miksonganiara, palsrukako ba kal·ako man·gipa manderangko chel·chakna, jokatna, sanna bananiko on·na aro gisikni gita dakchakanirangko on·an baksana songsalo mande palsrukaniko champengna miksonge ong·atanian ong·a.
Ia awareness program-ko ong·atanio, chatro chatrirangna agan-talate on·anggipa gipin manderangara, ICPS Jerry N Marak aro Baghmara-ni WPSI Dringchi Ch Sangma ong·a.
