TURA: Bristibar salo, Development Commissioner for Handlooms office, Guwahati-ni Weavers Service Centre aro Meghalaya sorkarini Textiles Department-ni ning·o donggipa Sericulture & Weaving Directorate nangrimenba, chang 11-gipa National Handloom Day-ko Tura-ni SMELC Building-o manidilangaha.
Ia program-ko ong·atanio, West Garo Hills a·jani Additional Deputy Commissioner Pearla TD Sangma, mongsonggipa sokgipa ong·e, jinmana aganprakangengon, chengonin Garo Hills-o ba·ra dokaniko ja·rikbagiparang ong·ani gimin ia daka rikaniko tange rakkiangchina ku·pattiangenba, ia gital chasongo gital ganding chindingrangko tarian baksana skangoni ja·rikbaenggipa bewalrangkoba dakangkuchina, Garo Hills-o ba·ra dokenggipa aro ganding chindingrangko tarienggipa manderangko didiangaha.
Songo noko donggipa manderangna, mongsongbate me·chikrangna ba·ra dokanichi maikai janggi tangani cholrangko on·na man·a, uarangni giminba ia tom·anio Sangma talate on·angaha.
Songni nokni manderangna janggi tangani cholrangko on·na gita dingtang dingtang department-rang, jakni kamrangko skie on·an baksana sorkarini scheme-rangkoba on·enga ineba ua aganaha.
Ia program-ko ong·atanio, ba·ra doke cha·enggipa manderangna sorkarini on·enggipa dingtang scheme-rangko on·na gita e-Pehchan Card-na biming segatanikoba dakangjolaha aro unbaksana Handloom Mark certification-naba bimingrangko segatangjolaha.
Ba·ra doke cha·enggiparangna kam ka·ani cholrangko nambatatna gita Individual Work Shed Scheme-ni ning·o dingtangmancha certificate-rangkoba sualatjolaha.
Ia National Handloom Day-ko manianio dongpae bak ra·anggipa gipin manderangara, Textiles Department (Weaving & Sericulture)-ni Deputy Director Sanre G Momin, West Garo Hills-ni District Handloom Officer Chengreng R Marak, North Garo Hills a·jani Handloom Extension Officer Nixon Kadam K Marak aro gipinrang ong·a.
New Delhi-o National Handloom Day-ko manigipakoba ia tom·anio dingtangmancha live mesokangaha.
