TURA: West Garo Hills a·jani a·kawe jolrango Maternity & Child Health (MCH) Hospital dongkujani a·sel, me·chikrang an·pakani aro bi·sarang saani somoirang, chel·a biaprangonasa re·ange sanna bananirangko ra·na nange neng·nikanirangko chagrongna nangtokenga ine All Meghalaya Minority Students Union (AMMSU) parakatenba, a·kawe joloba MCH hospital damsako kulie on·china Shillong-o donggipa Health Services-ni Director-ko didiataha.
“Da·o dipet West Garo Hills a·jani headquarter Tura songjinmaosan MCH hospital dongkuenga aro ian a·kawe jolrangonide namen chel·ani gimin an·o donggipa me·chikrang aro saenggipa bi·sarangnade namen neng·beani ong·enga. An·o donggipa me·chikrangko aro saenggipa bi·sarangko Tura-ona ra·anganio, ia jolrango nama jal·langrang namsrangjani gimin aro gari gorarangba chu·onga gita dongjani gimin ian nanggitikan somoirangode namen neng·nikani ong·enga,” ine AMMSU-ni president Nur Islam parakataha.
West Garo Hills a·jani a·kawe jolrango manderangna sanna banani aro an·seng baljokanirangko on·na gita dingtang dingtang health centre-rang, jekai Bhaitbari CHC, Phulbari CHC, Tikrikilla CHC, Kasiabari CHC aro Jeldipara PHC baksana gipin sub-centre-rangba dongachim ine janapatengon, ia health centre-rangoni damsakoba maternity hospital dake donkuja aro ia health centre-rango, sanna banani chol aro bosturangba dongkuja ine AMMSU parakataha.
Sorkarina seachi u·iatengon, Community Health Centre (CHC)-ona ra·doate da·o gital biapona apjitanggipa Bhaitbari Primary Health Centre (PHC)-ni biapo MCH Hospital-ko kulina gita AMMSU, ku·pattianiko on·ataha.
“Gitcham Bhaitbari PHC-ko da·o indin gale donaienga aro ia biapo CRPF sipai dolsa a·tip dakenga. Uni gimin ia biapon gitcham nokrangkoba taridape MCH Hospital-ko kulina nambatgipa biap ong·enga,” ine AMMSU-ni president parakataha.
Ia sorkarini biapo MCH Hospital-ko kulianiara korosrangko komiatasan ong·aigija, ia jolrango donggipa me·chik aro bi·sarangni namgnina MCH hospital-ko kulianio kamrangko ta·rakbatatgen ineba AMMSU parakataha.