Bhutan-oniko ro·ong salgipa garirang GH gita salrurana a·bachengtaia

TURA: Bhutan-oni Bangladesh a·songona ro·ong salruragipa truck garirang, salantian nangana bate ro·ongrangko gate Garo Hills-ni a·kawe jol gita salruraani a·sel ramarang nosto ong·atako man·ahani gimin baditaba jarangna dontongatani ja·man da·o ia truck garirang, apsan rama gita re·rurana a·bachengtaiengaha ine kobor on·aha.
Ia dumper truck garirang, nangana bate ro·ongrangko gate salani a·selan Garo Hills-ni a·kawe jolrango donggipa ramarang, mongsongbate Agia-Medhipara-Phulbari-Tura (AMPT) rama aro Garobadha-oni Mahendraganj-ona dakanggipa rama nosto ong·atako man·ahani gimin jolo songdongenggipa manderang aro dingtang dingtang dolrang badi ka·doangani ja·man ia truck garirangni re·ruraaniko district administration, baditaba jarangnade champengatahachim.
Indake ong·genchimoba ia truck garirang, da·o AMPT rama gita re·rurana a·bachengtaiengaha ine Bristibar attamo, Garo Students Union (GSU) Phulbari regional unit-ni dilgiparang u·iataha.
“Ia AMPT rama gita Bhutan a·songoniko Bangladesh a·songona ro·ong salruragipa truck garirang re·rurana a·bachengtaiahani gimin ramarang namjabatna a·bachengengaha. Ia ramara Bangladesh a·songni simaona dakanggipa rama ong·e namen gamchatbegipa rama ong·a indiba ro·ong salgipa truck garirangni, salanti re·ruraengani a·sel ramarang da·o obosta namsrangjae, rama gita salanti re·ruraenggipa manderang aro mongsongbate songni nokni manderang, neng·nikanirangko chagrongna nangtokengaha,” ine GSU Phulbari unit-ni secretary Pansrang Sangma aganaha.
Chibinang-oni Phulbari, Bhaitbari aro Rajabala-ona dakanggipa ramarang namsrangjani giminan adita salrangna skang songni manderang badi ka·doatahachim aro da·o ia rama gita ro·ong salgipa truck garirang re·rurana a·bachengtaiahani gimin ramani obosta namjabatsranggnok ine nikna man·enga.
GSU Phulbari unit-ni u·iatani gitade, ia ramao komibeoba damgni weighbridge-rang dongachim indiba ia weighbridge-rango ia truck garirangni kosako maming ja·kurangko de·jaenga.
“AMPT rama gita axle ge 3 donggipa truck garirangkosan re·na gita West Garo Hills-ni Deputy Commissioner niamko donahachim indiba kobor on·ani gitade, ia rama gita metric 50 ba 60 ro·ongrangko gatgipa garirang, jerangan axle ge 5 ge 6-rang donga, uarangba re·ruraenga,” ine GSU Phulbari unit-ni president Chuang Nyzer parakataha.
Iani bidingo sandirokaniko dakatchina aro ta·raken ia rama gita ro·ong salruragipa truck garirangni re·ruraanirangko champengatchina gitaba GSU Phulbari unit dabiangaha.