TURA: Garo Hills Autonomous District Council (GHADC)-o kam ka·enggipa manderang, ja 42 batpile dormaharangko man·jae neng·nikanirangko chagrongna nangtokengon, NPP-ni Executive Committee (EC)-ko chalaichengaoni 80 percent dormaharangko on·na man·aha aro bangki grorangde gitcham EC-rangoni dongbagiparangsa ong·a ine a·dokni Chief Minister aro NPP-ni national president Conrad K Sangma-ni badiaba badiaba news channel-rango a·kanganiko Meghalaya Pradesh Youth Congress (MPYC)-ba raken jegalataha.
Iana skang, Tura-ni MDC aro BJP-ni state vice president Bernard N Marak-ba iandake chief minister-ni a·kanganiko jegalatenba, GHADC-na chamatgimin kajinarangni bidingo manderangna nambate talatanirangko on·china didiatahachim.
GHADC-o ong·enggipa obostarangna gitcham EC-rangko dos galengani gimin chief minister-ko matnangatengon, ua gong kror 120 tangkarangko GHADC-na chamataha ine aganenga indiba ku·sikmangmangchi agananide kakketko mesokja aro office-o see rakkianirangsa kakketkode mesoka ine MPYC-ni president Timjim M Momin parakataha.
“Indita bilsirangna GHADC-o kam ka·enggiparang, an·tangtangni man·na nangkuenggipa dormaharangko man·jae, dedrangni skul fee-rangko gamanio, sagipa ding·gipa manderangko sanna bannanio aro nokdangko chalaianio neng·nikanirangko man·e gro jinang dakna nangtokengaha aro iani bidingo sorkario doktika changantian, uamangni neng·nikanirangko namatani pal, an·tangtangni kamrangkosa dongnuna aro sakgipinko matnangna jotton ka·skaronga,” ine Momin parakataha.
MPYC president-ni parakatani gitade, adita salrangna skang ong·atanggipa GHADC-ni budget session-o Finance-ni Executive Membor in-charge an·tangan, toktok dake, GHADC-o kam ka·giparangni man·na nangenggipa dormaharangko mesoke on·angaha aro uan 2015 bilsiode GHADC-o kam ka·giparangni man·na nanggipa dormahara jabrisanchim (kror 15.2), indiba 2021 bilsiode kam ka·giparangni man·na nanggipa dormaharang ja 32-ona bariange, nanggipa korosrang gong kror 126-na batangaha.
2022 bilsiode GHADC-o kam ka·giparangni man·na nanggipa dormaharang ja 26-ona bariange, nanggipa korosrangba gong kror 102-ona tang·doangaha ine janapatskaengon, ian opposition membor-rangni matnanggipa ong·ja indiba GHADC-o EC-ni see rakkigiparangan ong·a ine Momin parakataha.
“2015 bilsio kam ka·giparangni man·na nanggipa dormahara jabrisan ong·genchimode aro 2021 bilsio kam ka·giparangni man·na nanggipa dormaharang ja 32-ona bariangaha ong·ode, iako sawa bariataha? Nang·ni (CM) agana gita gong kror 120 tangkako GHADC-na watatbebeaha ong·ode, ia tangkarangara bachi gimaaha aro dormaharangko maina on·jaha? Nang·ni a·kanga gita GHADC-o dingtanganiko ra·baaha ong·ode maini gimin obostarang namroroani pal batesa namjabatroroenga?” ine Momin, a·dokni Chief Minister aro NPP-ni national president-ko sing·doataha.