SHILLONG: Meghalaya Civil Services (MCS) competitive exam ba porikkako seenggipa pilak candidate-rangnan apsan cholko on·na gita a·dok sorkari, ia porikkao optional subject ba an·tangtangni namnikgipa subject-ko basee seaniko bon·atna tik ka·angaha.
Meghalaya sorkarini Chief Secretary DP Wahlang-ni parakatani gitade, MCS porikkako seanio pilak candidate-rangan apsan susagrikani cholko man·china gita ia porikkao general study paper-rangsa dongaignok aro ian pilak candidate-rangnan apsan ong·gnok.
Mitam candidate-rang, jemangan rakbatgipa subject-rangko seengachim, uamangna bate mitam candidate-rang, badiaba subject-rango bang·bate mark-rangko man·enga ine nikahani gimin sorkari, MCS porikkao optional subject-rangko bon·atna tik ka·aha.
Optional subject-ni pal da·ode Meghalaya a·dokni gimin aro a·dokni itihas, daka rikani aro uandakgipa kamrangni gimin dingtang subject dongskagnok ineba Wahlang parakataha.
Chief Secretary-ni aganani gitade, iana skangde MCS porikkako seanio candidate-rang, ming 23 subject-rangoniko seokna man·achim indiba iako dakanichi porikka seanio apsan ong·jaengani gimin ia optional subject-rangko bon·atna tik ka·aha.