SHILLONG: Sukrobar salo, National Commission for Women (NCW)-ni tom·aniko Shillong-o ong·atangenba, Meghalaya a·doko segri me·chikrang, HIV man·gipa me·chikrang aro pekatgipa samrangko jakkalenggipa me·chikrang batroroengani gimin chanchirimangaha.
Ia tom·aniko NCW-ni chairperson Vijaya Kishore Rahatkar dilangaha aro tom·anio, a·dokni Chief Secretary DP Wahlang, Director General of Police (DGP) Idashisha Nongrang, Commissioner & Secretary Pravin Bakshi, Inspector General of Police (SB/Border) Dalton P Marak, Deputy Inspector General of Police (Eastern Range) Davies NR Marak aro gipin police official-rangba dongpae bak ra·angaha.
Tom·a matchotani ja·man kobor ra·timgiparangna talataniko on·angengon, a·doko segri me·chikrang, HIV man·giparang aro drugs jakkale watna man·gija dongenggipa me·chikrang batroroengani gimin maikai iandakgipa neng·nikanirangko chel·chakna man·gen, uarangni bidingo chanchirimangaha ine NCW-ni chairperson Rahatkar parakataha.
Rahatkar-ni aganani gitade, me·chikrangni iandakgipa neng·nikanirangko champengna gita a·dok sorkari, rakgipa ja·kurangko de·gen ine a·dokni Chief Secretary, NCW-na ku·rachakaniko on·ataha.
Meghalaya a·doko me·chikrangni kosako ong·gija dakanirang batroroengani gimin an·tangni suk ong·gijaniko parakatskaengon, me·chikrangni kosako ong·gija dakanirangko champengna sorkari aro police-rang dingtang dingtang cholrangchi kamrangko ka·engoba, ia kamrango songsalni bakrimanikoba nanga ine NCW-ni chairperson parakataha.
“Pilakan apsan ku·cholsan ong·e kamko ka·genchimosa me·chikrangni kosako ong·gija dakgipa kamrangde komianggen,” ine ua aganaha.
A·doko me·chikrangni kosako ong·gija dakgipa case-rangna sasti on·anirang komienga ine an·tangni chu·ongnikgijaniko parakatengon, iandakgipa case-rangko ta·rakbate jako ra·china ua, a·dokni police-rangko didiangaha.
Ia tom·anio, me·chikrangni namgnina ra·gatgipa dingtang dingtang scheme aro program-rangkoba nipilangaha.
Una agreba, Protection of Children from Sexual Offences (POCSO) Act, Protection of Women from Domestic Violence Act, 2005, aro Sexual Harassment of Women at Workplace (Prevention, Prohibition and Redressal) Act, 2013-ni giminba ia tom·anio chanchirimangaha.
