TURA: Assam a·doko niam gri songdong a·chaenggipa manderangko Assam sorkari a·rikgalengani gimin a·rikgalako man·gipa manderang, North Garo Hills a·jani sima gita Meghalaya a·dokona katnapna jotton ka·ani cholrang donga ine A·chik Holistic Awakening Movement (AHAM) Bajengdoba regional unit parakatenba, niam gri napsrukanirangko nambate nirokna man·na gita North Garo Hills a·jani Borojora aro Sualmari songrango police outpost-ko kulichina a·dok sorkariko didiataha.
A·dokni Chief Minister-na sedoatgipa chittio AHAM Bajengdoba regional unit-ni parakatani gitade, Assam a·doko niam gri songdong a·chaenggipa manderangko Assam sorkari a·rikgalengahani gimin a·rikgalako man·gipa manderang, Meghalaya a·doko katnapskana jotton ka·naba gnang ine ia songrango donggipa manderang kenchipchipe dongna nangtokenga.
“Ia songrangara Assam-ni simao ong·e, niam gri napsrukbagipa manderangna, mongsongbate ong·gija dakgipa manderangna kenchakna nangani ong·a. Ia jolrango police station aro outpost-rang dongjani a·sel, niam retirangko rakkianio olgrokaniko nikna man·enga aro ia songrango donggipa Tribal manderang, kenchipchipe janggi tangna nangtokenga,” ine AHAM Bajengdoba regional unit-ni president Kollingworth Sangma parakatenba, ia jolrango songdongenggipa manderangni namgninasan ong·aigija a·dok gimikni namgninan ia song damgnio, police outpost-rangko kulichina a·dokni Chief Minister-ko didiataha.