SHILLONG: Meghalaya a·dokni dingtang dingtang biaprangona rel garirangko ra·baani bidingo chanchirimna gita sorkarini songe on·gipa committee-o bakrimna jechakenggipa political dolrangni chanchianiko dingtangatchina a·dokni Chief Minister Conrad K Sangma didiatenba, rel project-ni bidingo chanchirimna gita committee-ko songchina dabienba da·o ia committee-o bak ra·na sikjaenggipa dolrangko sing·doataha.
Ia committee-o bak ra·na jegalaniko dingtangatchina aro rel project-ni bidingo chanchirimna gita pilak political dolrangni tom·e chanchirimanio bak ra·china gitaba ua dingtang dingtang political dolrangko didiataha.
Meghalaya a·dokni Khasi, Jaintia aro Garo Hills a·jarangona rel garirangko ra·baani bidingo maming ja·kurangko de·na skangba, manderang baksa aro dingtang dingtang dolrang baksa agangrikchenggen ineba Chief Minister parakataha.
Maming ja·kurangko de·na skangba, manderangni kenchakanirangko namatna gita apsan asonge agangrikchengna nanggen ineba ua aganaha.
Chief Minister-ni aganani gitade, a·dokni namroro silroroanina rel garirangko nangchongmota indiba manderangni nangnikanirangkoba nichengna nanga.
Ia project-na mitam minister-rangde chakpaanirangko on·enga ine janapatengon, rel garirangko Khasi Hills ba Garo Hills-ona ra·bana nanggenchimoba ia kamo songni manderang aro dingtang dingtang dolrangko bak ong·atna gita sorkari ku·rachakmanaha ine Chief Minister aganaha.
South Garo Hills a·jaona rel project-ni kamrangko a·bachengahama ine sing·on, da·o dipet kamrangko a·bachenga dongkuja ine Chief Minister talataniko on·aha.
Chief Minister-ni parakatani gitade, Khasi Hills a·jao rel garirangko jegaltokengani gimin a·dokni gipin biaprangona ra·angskana cholrang dongama dongjawa uko Union Minister-ba sing·aha.
Rel project-ni bidingo chanchirimna sorkarini songe on·gipa committee-ni gimin janapatskaengon, ia committee-ni chanchirimaniona pilak political dolrangkon sorkari okamataha indiba mitam dolrangsa jechakenga ine Chief Minister aganaha.
Ia dolrang bakrimjagenchimoba, ia committee-ni kamkode ka·angkuaigen ineba ua talataniko on·angaha.