SHILLONG: State Reservation Policy (SRP)-ni bidingo Expert Committee-ni tarigipa report-ko bakan chapa ka·enba, ia jani bon·angachibara Cabinet-ona ra·anggnok ine Sukrobar salo, a·dokni Chief Secretary DP Wahlang parakataha.
State Reservation Policy-ni bidingo Expert Committee-ni report-ko re·anggipa June jaon, Meghalaya sorkarina on·angahachim ine nikna man·a.
“Expert Committee-ni ku·pattie on·gipa report-ko anga chapa ka·na nangkuenga aro kamrangko da·o ka·engaha,” ine Wahlang aganaha.
Chief Secretary-ni aganani gitade, Expert Committee-ni report-ko August 31 tarikni gisepon on·china Cabinet ge·etahani gimin ua somoi gitan ia report-ko Cabinet-ona sokatgen.
Expert Committee-ni on·gipa report-ara namen bakrobegipa report-ko ong·a aro iako poraie nipilna gita a·dokni Chief Secretary baksana gipin dal·dalgipa official-rangna pakwate on·ataha ine adita salrangna skangsan a·dokni Cabinet Minister Paul Lyngdoh parakatahachim.
State Reservation Policy-ko gital dake nipiltaichina dingtang dingtang dolrang dabitokahani gimin Justice (Retd) Mool Chand Garg-chi dilgipa Expert Committee, a·dokni dingtang dingtang biaprango songdongenggipa manderang aro dingtang dingtang dolrangni nangnikani aro chanchianirangko ra·e ia report-ko tariahachim.