SHILLONG: United Democratic Party (UDP)-ni gitcham general secretary Jemino Mawthoh-ni kam wate party-oni ong·katangaoni jagnini ja·man da·o UDP-ni gital state general secretary-na Khasi Hills Autonomous District Council (KHADC)-ni Opposition-ko dilenggipa Titosstarwell Chyne-ko seokaha.
Iako Sukrobar salo, UDP-ni central executive committee (CEC) tom·ani ja·man, UDP-ni president Metbah Lyngdoh, kobor ra·timgiparangna parakataha.
“Chinga Titosstarwell Chyne-ko UDP-ni gital general secretary-na ra·chakaha,” ine Lyngdoh aganaha.
MDA sorkarini Cabinet-ko gital dake sualpiltaiani cholrang donga ine jangbingbanganirangko knasona man·engani gimin UDP-ni cabinet seat-ko sakgipinna on·skana chanchianirang dongama ine sing·on, iani bidingo adita sak dilgiparang chanchina miksongahachim indiba CEC-ni tom·aniode ian chanchiani kam ong·ja ine ia dilgiparangni nangnikanikoba uamang changgipinona donangskaaha ine Lyngdoh parakataha.
UDP-ni gital general secretary songahani gimin an·tangni kusi ong·aniko parakatskaengon, “Party-ni general secretary ong·na gita angko krae nikahani gimin anga CEC-ko mittelna ska,” ine Chyne aganaha.
UDP-ko bilakbatatani aro party-ni gisepo seoka man·gipa dilgiparang baksa nambate kamrangko ka·na gita ua an·tangko on·kange kam ka·anggen ineba UDP-ni gital general secretary ku·mikchetaniko dakangaha.
Gitcham general secretary Jemino Mawthoh-oni kam watangaonin party-ni kamrangko ka·anio adita neng·nikanirangko chagrongna nangengachim ine janapatengon, “Angna on·gimin daitoko anga chu·sokatna ku·rachakenga,” ine Chyne aganaha.