TURA: Chokpot Community Health Centre (CHC)-o doctor-rangni komianina aro name dake kam ka·jaenganina a·dokni nirokatjani bidingo chanchina nangchongmotgipa ong·e South Garo Hills-ni Chokpot Civil Sub-Division-ni NGO-rang sing·doangaha.
CHC-ko chalaiani aro obostarangni bidingo bang·a neng·nikanirangko man·enganio GSU-ni aro Chokpot Area Vigilance membor-rang 2025 August 6 tariko sanna bannaniko on·enggipaona tang·gitik wenange niaha. Uamangni wenangani somoiba uamang doctor saksamangmang duty-o ong·enganiko nikaha, community gimikna sanna bannaniko on·a neng·enganio doctor saksamangmangchin CHC gimiko maidake chalaina chanchiaha CHC-o sakgipin doctor-rangni post donga indiba re·baja ian nangchongmotgipa sing·ani ong·enga, ine GSU Chokpot Unit-ni Jish A Sangma aganangaha.
CHC-o dingtang dingtang dakgipa gipin neng·nikanirangko man·enga jekai male ward-o ceiling fan kam ka·ja, bijolirang chinge dongkamja aro mitchichi daka aro paikana aro auchakramrangoba rongtalja, iarangchin kam ka·anirang namjaenga aro nangchongmotgipa authority-rangni gita galchipmanchaaniko nikna man·enga. Jeon sanna bannaniko ra·na re·bagipa manderangna aro chel·begipa biaprangoni re·bagiparangna neng·nikani ong·enga, ine dolgni NGO-rang aganangaha.
“Sanna bannaniko on·enggiparangni kam ka·aniko ra·chakna man·gijagipa ong·eng aro nambata gadango nangchenggipa sanna bannaniko on·anio niamko pegipa ong·enga,” ine GSU-ni president kobor ra·timgiparangna parakataha.
Doctor-rangni aro kam ka·giaprangni komianina ta·rake ja·ku de·china nangchongmotgipa authority-rangko NGO-rang raken mol·molangaha aro Chokpot-ni manderangna nambata gadango sanna bannaniko on·piltaichina aro kragipa bewalo name dake rakkichina didiangaha.
