Chiading: Garo Hills-ni bang·a lower aro middle school-rangni obosta namsrangja, jeni a·sel school poraigipa bi·sarang aro skigiparang salantion neng·nikarangko chagrongna gita nangenga. East Garo Hills-ni Chiading songni school-rangni obostaba namsrangja.
Ua school-rangara Mukul Sangma-ni constituency Songsak-ni ning·o ga·aka.
Dilma Mandalgipe SSA LP School
Chiading bajaroni metres 200mang chel·ao donggipa aro St George’s School (private institution)-ni mikkango donggipa Mandalgipe School-ni obosta namsrangja. Km 500-mang chel·ao ge·sa private school ge·sa dongchapa.
Mandalgipe SSA LP School-o sak 20 poraigiparangsan donga, uamangko skigiparang sakgni skigiparang donga. Ua school-o staff-room-na agre ge 7 classroom-rangsan dongaia.
Ua school-oni obostako nia ong·ode galchipe dona gitan nikaia. Iandakgipa school-rango maidake bi·sarang namgipa skia-poraniko man·gen.
School mikkangon bi·sarangko nikna neng·a, name dake sandie niosa saksa sakgni bi·sarangko nikna man·aigen. School-ni infrastructure-ni obosta namsrangja. Mikka wagenchimoba class-kon ka·na man·jawa.
Ua school-ni staff-room-san namkala, unosan mande dongna kraia, indimangba ua roomni nokkingrango a·kolrang donga.
“Ua room-kon nangchongmotgipa lekkarangko donna jakkala, indiba mikka waa bilongahaode gamchatgipa lekkarangko chelchake rakkina man·ja. Gimik room-rangni a·parang namjaha ine school-o skigipa aganaha.
School-ni obosta namjani gimin education authorities-na aro Block officer-rangnaba u·iatahachim indiba maming dakchakako man·kujaenga. Bilsi 2009-o ua school-ko a·bachengaha.
“SSA teacher-rangni dormaha komibea, indiomangba anga an·tangni tangkako jakkale school-na namgnirangko dakna jotton ka·a, indioba maming namgniko man·ja, batesa angni tangka koros ka·ani indin ong·aia. School-na on·gipa grant-chi school-ko chalainan chu·ongmanja. Staff room-na agrede ge·samangba classroom naman dongja.
Iarangni gisepon Block-ni CRC, ia apsan songo donga aro ua school-ni obostarang gimikkon u·ia indiomangba maming dakchakaniko man·ja.
School-ni do·ga aro kelkirang dongjani a·sel atamni somoiode chu ringgiparangsa school-o nape dongtoka. Uamang school-o su·bu, ki·erang dona, jeni a·sel school bi·sarang class-ko a·bachengna skang rongtalatna nanga, iandakgipa neng·nikarangko chagrongenga ine skigipa aganaha.
Dilma Chiading Ad-Hoc UP School
Ia school Chiading bajar anti cha·gipani sepangon donga, ia bilsi sak 19 bi·sarang school-o biming segataha. Gipin UP school-rang gitan ia school-oba sak 4 skigiparangsan donga aro school-ni obosta namja.
“School-ni nokking nosto ong·ani gimin maintenance-ni tangkako meja bilsi jakkalaha. Indiba tangka chu·ongmanjae nokking tariako matchotna man·jaha. School-ni ceiling ru·uta bilsirang skangsan nosto ong·aha skigipa aganaha.
Ia bilside grant-ko man·kujaenga. Koborni gitade school-ni gitcham headmaster, jekon ra·galaha, ua school -ni development-na tangka man·gipako jakkalsretaha.
Ia school-ni infrastructure-ba namsrangja indiba maming nirokata dongja.