KJGP, Ri Bhoi-ni karkanarango license gri kam ka·enggiparangko watatpila.

Nongpoh: Meghalays-ni Ri Bhoi district-ni ning·o ong·gipa Byrnihat-ni dingtang dingtang  karkanarango aro bajar antirango labour license gri gipin a·dokrangoni re·bae  labour-ni kamko ka·enggiparangko  Sukkrobar salo,  Federation pf Khasi  Jaintia aro Garo People (FKJGP)-ni dolrang sing·sandianirango dakenba license donggijagipa labourer-rangko songtangtangchina watatpila. Ia am·sandianirangko, Assam a·doko sorkarini aarangoniko a·rikgalani kamrangko ka·engon, a·rikgalako man·gipa manderangni  Meghalaya a·doko kamrangko am·sandiani bidingo aro songdongna miksonge napbaanina kenchaksoanirang ong·engani gisepo warachaksona miksonge ja·ku de·anian ong·a. Indake ia  am·sandianirangko mongsongbate Meghalaya-Assam sima sepangjolrango donggipa karkanarang kam ka·enggiparangko sing·sandianirangko dakangaha. FKJGP-ni dilgiparangni u·iatani gitade, ia am·sandianio, gipin a·dokrangoni re·bae dokkanrangko kam ka·enggipa sak ritchana batgiparang, labour license aro police verification donggijagiparang ong·a ine ma·sina man·aha aro maming pangchakani lekkarang gri kam ka·enggiparangko uamangni songtangtangchina watatpilaha ine parakataha.Una agreba,  uamangoni mittam kam ka·giparang bilsi 18-ni ning·o ong·giparangsan ong·a aro ian Child Rights Act aro state labour laws-ni a·palo ong·aniba ong·a ineba u·iatangaha. FKJGP Byrnihat Circle President Kitborlang Suting-ni kobor-na parakatani gitade, ia am·sandiani kamrangko, Byrnihat-ni adita karkanarango niamgri kam ka·enggiparangko rakkian baksana uamangna dongchakanirangkoba on·kamenga ine kobor-rangko man·soani bikan am·sandiani kamrangko a·bachengataha aro  pangchakani lekkarang donggijagipa sak ritchasana batgipa kam ka·giparangko mikkangchi niamgri Meghalaya a·dokona kamrangko ka·na re·bajachina rakgipa mikrakatanirangko on·ne songtangchina watatpilaha. Una agreba, Meghalaya-ona  gipin a·dokrangoni kam ka·na re·baenggiparangni  license-rangko name nirokanirangko dakjaengani gimin FKJGP-ni dilgiparang,  Khasi Hills Autonomous District Council (KHADC) aro state Labour Department-ni  kosako matnangatenba, mikkangchi niamgri labourer-rangko rakkienggipa company-rangko rim·a man·taiode uamangni kosako rakgipa ja·kurangko de·gen ine mikrakatangaha.