TURA: Sonibaro Nationalist Congress Party (NCP) Re·baenggipa 2026 bilsio Garo Hills Autonomous District Council (GHADC)-ni Election-o bilake kam ka·na gita chanchirimaniko dakna aro District-na dilgiparangko seokangna West Garo Hills, Nokma Council Building Tura-o tom·aniko ong·atangaha. Ia tom·aniona Meghalaya NCP unit-ni President Omillo K Sangma, Vice-President, Marbindruth Ch Momin, Organizer, Daniel M Sangma aro me·chikrangni State President, Serimina D Marak unbaksa Garo Hills-ni pilak District-rangonin NCP-na kam ka·giparang re·bae bak ra·angtokaha. Uamangni tom·anio re·baenggipa 2026 bilsio GHADC election-o susanagipa sakgittam candidate-rangni bimungrangko State President Parakatangaha, Uamangara Rongrong Constituency-na Sengmatchi M Sangma, Bolsong Constituency-na Dringbirth D Sangma aro Shymnagar Constituency-na Rasel Choudary ong·achim. Apsan dake district-na dilgiparangko seokangaha, uamangara East Garo Hills District President B Ch Marak, West Garo Hill District President Dominic Arengh, South West Garo Hills District President Jean Colline R Marak aro South Garo Hills District President Hawel R Marak ong·a inbaksa West Garo Hills-o Chadamberangko dilna gita President Jaisunrise J sangma, Secretary-na Bansal K Sangma aro Sukkam D Sangma uamangko seokangaha.
NCP State President Omillo K Sangma Party Ticket on·ani gimin aro district-na dilgiparangko seokani gimin aganangengon, Party-ko bilakatna aro jatna a·songna dangdike on·a sikgiparangna GHADC Election-o susana gita chinga sakgittamni bimungrangko da·o dipet parakatkuenga aro mikangchi parakatkugen ine aganangaha aro party-ko bilakatna dontonggijan chinga tom·anirangko ong·atenga ine aganangaha.
Tom·anio NCP State Women President Serimina D Marak ni jinmana aganangengon, “ An·chingni NCP party gital ong·ja aro State-ni party-ba ong·ja ian National party ong·a. Unigimin an·ching ia party-ko Council-o bilakate State-ona aro Central-onaba sokangna man·gen unigimin party-ko bilakatna sakanti dilgiparang aro party-na kam ka·giparang apsan ku·monge kam ka·na nanggen ine aganangenba da·o dipet GHADC-o susanagipa sakgittam candidate-rangkosan man·kuenga aro mikangchi man·a ka·dongsoenga ine aganangaha”. una agreba saoba NCP ni party ticket-o susanagipa dongode dorgasko galna gita sakantikon rimchaksoenga ineba Marak aganangaha.
NCP ni candidate ong·e susanagiparang an·tangtangna Party Ticket-ko on·anina Mittelangan baksa sakantian an·tangtangko on·kange ku·monge kam ka·na aro chegenchimode A·chik jatni palo ku·rang on·e GHADC-ni ong·enggipa obostarangko man·a dipet namatna jotton ka·gen ine aganangtokaha