GHADC-o kam ka·giparangni dormahana kr 252-ko on·china ANVC dolrang, ma·mong sorkariko didia
TURA: Robibar salo, A·chik National Volunteer Council (ANVC) aro ANVC-B dolni gitcham dilgiparang Tura-o tom·aniko ong·atangenba, 2014 bilsini September 24 tariko ma·mong aro a·dok sorkarirangni songgigrikanirangko da·onan chu·sokatchipkujaengani gimin tom·e chanchirimangaha.
ANVC aro ANVC-B dolrangni u·iatani gitade, Agreed Text for Settlement (ATS) ba sorkarirang baksa uamangni soi ka·grikgipa songgigrikanio, sorkarirangni ku·rachakgipa kamrangko nirokna gita jadokantian Centre Level Monitoring Committee (CLMC)-ni tom·aniko ong·atna niamko donahachim. Indake ong·genchimoba, 2020 bilsionin CLMC-ni tom·anirangko changsaba ong·attaia dongkuja aro ian uamangni sorkari baksa songgigrikaniko maming miksonga gri ong·ata gita ong·enga ine ANVC dolrang parakatenba, iani bidingo Union Home Minister Amit Shah-na sedoatna tik ka·aha ine u·iataha.
“ATS-ni Para 12.1-o janapani gitade, CLMC-ni tom·aniko bilsio changgni dake ong·atani ong·achim indiba batanggimin bilsidokni gisepo changsaba iandakgipa tom·aniko ong·ata dongkuja. Uni gimin chingni sorkari baksa songgrikani gamchataniko mesokna gita CLMC-ni changgipin tom·aniko Garo Hills-o ong·atchina chinga didienga,” ine ANVC aro ANVC-B dolni dilgiparang parakataha.
ATS-ni Para 1.1-o A·chikrangni identity ba ong·aniko aro ku·sikko chel·chakan baksana songko nokko chalaidilgiparangna tangka paisarangko on·e dakchakna ku·rachakani gnangchim indiba da·alonan ia ku·rachakanirangko chu·sokatkujaenga ineba ANVC dolrang parakataha.
ANVC dolrangni soi ka·grikgipa songgigrikanio sorkarini ku·rachakgimin gita songko nokko chalaigiparangna tangka paisani gita dakchakanirangko on·na dingtangmancha niamrangko ra·gatchina gitaba ANVC dolrang didiataha.
Una agreba, sorkari baksa songgigrikgimin gita Garo Hills Autonomous District Council (GHADC)-ni ning·o dingtang dingtang namroro silroroani kamrangna tangka paisarangko bang·bate chame on·angkuchina, tangka paisani kamrangko nirokna finance commission gita dakgipa bimangko songe on·china, songko nokko chalaigiparangna bilsi bongana changsano tangka paisani gita dakchakanirangko on·china gitaba ANVC aro ANVC-B dolni dilgiparang, sorkariko didiataha.
ANVC dolrang baksa sorkarini songgigrikanio soi ka·aniara Garo Hills-o tom·tomani aro namroro silroroaniko ra·bana ja·ku de·chakanisa ong·achim ine janapatengon, “Ia songgigrikanio dongimin niam aro ku·rachakanirangko nichanggalaniara ANVC aro ANVC-B dolni ka·donganiko cha·boka gitasan ong·jaenga indiba Meghalaya a·doko Tribal-rangni janggi tanganiko nambatatna Garo manderangni ka·dongsoaniko ra·ongalani gita ong·enga ine ANVC dolrang parakataha.
ATS-ni Para 7.2, 7.5 aro 11.1-o pangchake GHADC-na tangka paisarangko watsochina mol·molatengon, GHADC-o kam ka·enggipa manderang, ja 42 batpile dormaharangko man·jae neng·nikanirangko chagrongna nangtokengani gimin, kam ka·giparangni bangki dormaharangko on·na man·na gita 5th Pay Commission-ni ning·o gong 252,01,00,000 tangkarangko ba One-Time Bailout Grant-ko on·e dakchakchina ANVC aro ANVC-B dolrang, India sorkarini Home Affairs Ministry-ko didiataha.
Unbaksana Forest Related Development Project-rangna gong 308,14,27,382 tangkarangko aro Rural Infrastructure & Agriculture Promotion-na gong kror 104.34 tangkarangko dakchakatchina gitaba ANVC aro ANVC-B dolrang, ma·mong sorkariko didiataha.
“Ia tangka paisarangko ma·mong sorkari ta·raken on·atna man·genchimode, GHADC-o kam ka·enggipa manderang pilakan, an·tangtangni man·na nangkuenggipa chu·gimik dormaharangko man·tokpagnok aro dingtang dingtang namroro silroroani kamrangkoba chu·sokatna man·gnok,” ine ANVC aro ANVC-B dolni dilgiparang parakataha.