TURA: Adita salrangna skang, Jammu & Kashmir a·dokni Udhampur a·jao donggipa Kandwa-Basantgarh jolo, uamangni gadoenggipa gari, a·kuangchina ga·akonange a·sel ong·anio, Garo Hills-oni dangdike on·enggipa Central Reserve Police Force (CRPF)-ni sipai saksa Anondo Koch-ba sina nangaha ine koborko on·aha.
Koborko on·ani gitade, re·anggipa August-ni 7 tarik pringni 10:15 bajimango, QAT Basantgarh-o kam ka·enggipa CRPF sipai dolsa, OPS duty-oni re·bapilengmiting somoio a·sel ong·aha aro ia a·sel ong·anio, Anondo Koch baksana CRPF-ni sakgipin sipai Arvind Kumar-ba so·otako man·aha.
A·sel ong·anio sianggipa Anondo Koch-ara, South West Garo Hills a·jani Kalaigaon Khasipara songoni ong·achim aro uni manggisiko, 175 Bn CRPF-ni garirango, Guwahati airport-o ra·chaksoenba, rama gita uni songona sokate on·aha.
Sianggipa Anondo Koch-na Sonibar salo, bon·kame mande ra·pilskaaniko dakaha aro una mande ra·pilskaaniko dakanio, CRPF North Eastern Sector-ni IG Anshuman Yadav-ba dongpaaha.
CRPF-ni sipaina mande ra·pilskaaniko dakanio, Mahendraganj-ni MLA Sanjay A Sangma, SWGH a·jani SP Vikash Verma aro dingtang dingtang official-rangba dongpae bak ra·angtokaha.
