SHILLONG: Odisha a·dokni Jaleswar-o Kristian dilgiparangko, Bajrang Dal membor-rangni chadrapanina United Democratic Party (UDP) raken jegalataha.
Songsalna dangdike on·enggipa Kristian dilgiparangko kragija dake chadrapani gimin an·tangni suk ong·gijaniko parakatengon, ia Kristian pamongrang aro sister-rangni kosako, torom ra·draatna jotton ka·a ine matnangenba chadrapaniara, India a·songo Kristianrangko aro gipin chonchongipa toromrangko dokkol ka·e rona jotton ka·aniko mesokani ong·a ine UDP-ni general secretary Titosstarwell Chyne parakataha.
“Iandake Kristian dilgiparangko chadrapanio jak donggipa manderang, je dolniba ong·china, uamangni kosako ta·raken rakgipa ja·kurangko de·china chinga dabienga aro je biaprangon iandake kenchakna nanganirang ong·engachim, uandakgipa biaprango Kristian pamongrangna aro sister-rangna chel·chakanirangko on·chinaba chinga dabienga,” ine Chyne parakataha.
Mikkangchi iandake toromna kam ka·gipa manderangni kosako chadrapanirang dongjana gita aro a·songo mandena aro jatna on·gimin bilrangko rakkina man·na gita rakgipa ja·kurangko de·chinaba UDP-ni general secretary, India sorkari aro Odisha sorkariko didiataha.