GHADC-ko BJP-chi chalaina NEDA-ni convenor-ko didia
TURA: Garo Hills Autonomous District Council (GHADC)-ko chalaianio neng·nikanirangko nikna man·engon, Bharatiya Janata Party (BJP)-ni dilanichi GHADC-ni Executive Committee (EC)-ko chalaigenchimode, pilakni gitan dingtanganiko ra·bana man·gen ine Tura-ni MDC aro BJP-ni state vice president Bernard N Marak parakatenba, GHADC-ni EC-ko BJP-ni dilanichi chalaina gita North East Democratic Alliance (NEDA)-ni Convenor aro Assam-ni Chief Minister Himanta Biswa Sarma-ko didiataha.
“2014 bilsio ANVC dolrang baksa ma·mong aro a·dok sorkarirangni songgigrikanio soi ka·grikaniko da·alonan nichanggalengani gimin aro GHADC-ko niam bidiko pangchake chalaianio Meghalaya sorkarini chu·sokjaengani gimin EC-ko dingtangatna nangani ong·engaha ine anga nikenga,” ine Marak, NEDA-ni convenor-na sedoatgipa chittio parakataha.
Tura MDC-ni parakatani gitade, 2014 bilsini September 24 tariko New Delhi songjinmao soi ka·grikgipa ‘Garo Accord’-ara Meghalaya a·doko autonomous district council (ADC)-rangni jakgitelani aro chalaianiko bilakatpiltaina songgigrike soi ka·grikgipasa ong·achim aro ia ‘Garo Accord’-o niamrangko talen seahaoba a·dok sorkari, department-rangko district council-ona ra·jitatkujaenga, man·gni kajinarangko ra·chipenga aro District Council-ni manderangna dangdike on·ani bilko ra·seka gita ong·enga.
“ANVC dolrang baksa songgigrikanio soi ka·grikgipa ‘Garo Accord’-ko chu·sokatchipjaengani a·selan GHADC-o tangka paisani gita bilgrianiko aro kam ka·enggiparangna ja 43 ong·pile dormaha on·na man·gijako nikna man·engaha,” ine Marak parakataha.
NEDA-ni dilanichi salgro salaram a·dokrango kim·kim ong·aniko aro namroro silroroaniko ra·bana man·aha ine janapatengon, GHADC-o dingtanganiko ra·bana gita BJP-ni dilanichi EC-ko chalaina on·china Tura-ni MDC, NEDA-ni convenor-ko didiataha.
BJP-ni dilanichi GHADC-o songni nokni dilgiparangko bilakatpiltaina, buring bolgrimrangko ripingna, lekka porako tang·doatna aro an·seng baljokani kamrangko namdapatna man·gen ineba Tura MDC parakataha.
“Una agreba GHADC-o BJP-ni EC-ko dilanichi, kajina gilaniko namdapatna, man·gni kajinarangko somoi gita man·bana, kam ka·giparangni man·gni dormaharangko on·na, council-ko tangka paisani gita bilakatpiltaina, Garo Accord-ko kakket aro bebeo chu·sokatna, jatni bil aro niam retirangko rakkina Nokmarangko mangrakbatatna man·gen,” ine Marak parakataha.