TURA: Garo Hills Autonomous District Council (GHADC)-o kam ka·giparangni dormaharangko da·o a·dok sorkarichi on·skana tik ka·aniara National People’s Party (NPP)-chi chalaienggipa Executive Committee (EC)-ni kamtango choligijaniko mesokanisa ong·enga ine Mongolbar salo, Meghaya Pradesh Youth Congress (MPYC)-ni president Timjim K Momin matnangataha.
GHADC-o kam ka·giparangna dormahako a·dok sorkarisa, Deputy Commissioner gita watatskagnok ine Sombar salo GHADC-ni Chief Executive Membor (CEM) aro Deputy CEM parakatahachim ine nikna man·a.
GHADC-o kam ka·giparangna dormaha on·ani daitoko sorkarina palgalenga ine matnangatengon, “Dormaha on·anide je biapoba chalaidilgiparangni on·ani kamsa on·a. Kam ka·giparangna dormaha on·ani daitoko a·dok sorkarina pakwatanichi, GHADC-ko chalaianio maming kamrangon ka·dongchakna man·ani dongjaha ine NPP-chi chalaienggipa EC mesoke on·aha,” ine Momin parakataha.
GHADC-ko chalaianio aro kam ka·giparangna dormaharangko on·anio a·dok sorkaride maming dakeba bak dongja ine changni chang a·dokni Chief Minister Conrad K Sangma an·tangan a·kangateba da·o GHADC-o kam ka·giparangna a·dok sorkarini gita dormaharangko on·skana tik ka·engani giminba MPYC, NPP-ni miksonganiko sing·doataha.
“Kam ka·giparangna a·dok sorkarisa dormaharangko on·enga ong·ode maikai daito dongja ine a·kangna man·a? Ian manderangna dakmikasan ong·ja indiba an·tangtangni MDC-rango ka·dongna man·gijaniko a·dok sorkarini mesokaniba ong·a,” ine Momin parakataha.
Iandakgipa ja·ku de·aniara NPP-ni gisepo ka·dongna man·grikgijaniko mesokaniba ong·enga ine janapatengon, “Chief Minister, an·tangni MDC-rango ka·dongna man·jaha aro MDC-rang an·tangtangba an·tangtangni gisepo meligriktokjaengaha. Garo Hills-ni manderang da·o GHADC-ni EC-o aro NPP-ni dilgiparangoba ka·dongna man·jaengaha,” ine MPYC-ni president parakataha.
NPP-chi chalaienggipa EC kakket ong·e kamko ka·genchimode GHADC-o iandakgipa obostako chagrongna nangjawachim ine janapatengon, iandake GHADC-ko rusie galaha ine Garo Hills-ni manderango kema bi·china NPP-chi chalaienggipa EC-o aro NPP-ni dilgiparango MPYC dabiangaha.