TURA: South Garo Hills a·jani Rongara primary health centre (PHC)-o sanne bane on·gipa doctor-rang chu·ongjae aro ambulance-rang dongjae, manderangna sanna bananirangko on·anio neng·nikanirangko chagrongna nangenga ine Association for Democracy & Empowerment (ADE) Rongara regional unit parakatenba, ia PHC-na dakchakgipa doctor saksako aro ambulance bolsako on·china sorkariko didiataha.
Iani bidingo South Garo Hills a·jani Deputy Commissioner-na sedoatengon, Rongara PHC-o kam ka·gipa doctor saksako gipin biapona ra·jitangani ja·man doctor saksanchi Rongara jol gimikni manderangna sanna bananirangko on·na nangengani a·sel neng·nikanirangko chagrongna nangenga ine ADE Rongara regional unit parakatenba, ia doctor-na dakchake on·gipa mande saksako on·dapchina didiataha.
“Ia health centre-o doctor saksasan ong·e gipin kamrangna dingtang biaprangchi re·angna nangahaode, health centre-o sagipa manderangko sanne bane on·gipa manderang dongjae, bang·en neng·nikanirangko chagrongna nangtokenga aro sagipa manderangna kenchakna nanganirangba ong·ronga. Ia PHC-o doctor-rang chu·ongjaengani a·selan an·o donggipa me·chikrangko sanna bannanirangkoba neng·nikanirangko chagrongna nangenga,” ine ADE Rongara regional unit president Xenyan D Sangma parakatenba, ia PHC-na dakchakgipa doctor saksako on·china South Garo Hills a·jani Deputy Commissioner-ko didiataha.
Rongara PHC-o ambulance dongjani a·selba sagipa manderangko salna nangani somoirango, mongsongbate chel·a biaprangoniko hospital-ona salbana nangani somoirango neng·nikanirangko chagrongna nangenga ineba ADE Rongara regional unit parakataha aro ia PHC-na sorkari ambulance bolsako ta·raken on·atchina Deputy Commissioner-ko didiataha.