SHILLONG: Mizoram a·doko ra·chakgimin gita Meghalaya a·dokoba Territorial Army-ko bikotchina Khasi Students Union (KSU)-ni dabiangani ja·man, a·doko iandakgipa army ba sipai dolko bikotna a·dok sorkari ra·chakangaha.
Iani bidingo kobor ra·timgiparangna talataniko on·angengon, Assam aro Mizoram a·dokrangode a·doktangtangni Territorial Army-ko songaha aro Meghalaya-oba Territorial Army-ko songna gita kamrangko a·bachengna a·dok sorkari cholko man·engaha ine Budbar salo, MDA sorkarina ku·wattimgipa Paul Lyngdoh parakataha.
Iandakgipa Territorial Army ba ‘Manderangni sipai dolko’ bikotna dabianiara, 2001 bilsio Pyrdiwah-o a·sel ong·ani somoion KSU-ni dabichenggipa ong·a aro ua somoio da·o Cabinet Minister ong·enggipa Paul Lyngdoh an·tangan KSU-ni president ong·engachim.
Meghalaya a·doko Territorial Army-ko bikotna ra·chakgipa pilak u·iatna nanganirangko August-ni 26 tariko, a·dokni Cabinet-na u·iatgen ine Lyngdoh parakataha.
Lyngdoh-ni aganani gitade, gipin biaprangoni napsrukbaenggiparangko champengna BSF aro a·dok sorkarina agre, songo donggipa manderangni dakchakanirangkoba nangenga aro ia Territorial Army-an iandake napsrukanirangko champenganio kamrangko ka·na man·gen.
Indo-Bangla simarangko nitimenggipa BSF dolni kamo a·dok sorkari kusi ong·jaengama ine sing·on, iandake agananiko Lyngdoh jegalatskaenba, sipai dolrangna dakchakna sorkari, manderangni bakrimanikosa nangenga ine parakataha.
BSF dolo Meghalaya a·dokni chadamberangkoba rimnapna gita adita salrangna skangsan ge 300 kamrangna advertisement ba u·iataniko on·manaha ine kobor on·aha.