TURA: 2014 bilsini September 24 tariko ma·mong aro a·dok sorkarirang baksa songgigrikanio soi ka·grikgipa A·chik National Volunteers Council (ANVC) aro ANVC-B dolrang da·o ‘Unified Group of Garo Accord Signatories’ ine mingskaenba, ‘Garo Accord’ ba Garo Hills aro a·dokni Autonomous District Council (ADC)-rangko mangrakbatatna songgigrikaniko chu·sokatchina dabiangaha.
Iani bidingo a·dokni Chief Minister Conrad K Sangma-na sedoatengon, ia gital dolko bikotaniara, batanggimin bilsi 10-na sorkarini chu·sokatchipgija donenggipa ‘Garo Accord’-o songgigrikgimin niamrangko chu·sokatchina dabina gital dake ja·ku de·ani ong·enga ine gitcham ANVC aro ANVC-B dolrangni nangrime bikotgipa dol parakataha. Ia dolgnini gisepo meligrikgijanirangko namatna man·aha aro ia dolgnian da·o a·dokni manderangna ku·rachakgimin kamrangko chu·sokatna re·mikkangenga ineba uamang parakataha.
“2014 bilsio ma·mong aro a·dok sorkarirangni dilgiparang baksana gitcham Union Home Minister Rajnath Singh, aro gitcham Minister of State (Home) Kiren Rijiju-ni mikkango New Delhi-o songgigrike soi ka·grikaniko chu·sokatna gita ja·kurangko de·china chinga didienga. Ia Garo Accord-ara, Indian Constitution-ni Sixth Schedule ning·o ADC-rangko mangrakbatatna miksonge soi ka·grikanian ong·a aro chingni ia gital dolko bikotaniara, ia songgigrikaniko chu·sokatna ja·ku de·chakattaianian ong·enga,” ine dolgnini dilgiparang, Chief Minister-na sedoatgipa chittio parakataha.
A·chikrangni nanganirangko kakket aro bebeo chu·sokatna gitasa ANVC aro ANVC-B dolrang, ma·mong aro a·dok sorkarirang baksa songgigrikanio soi ka·ahachim ine janapatskaengon, ia songgigrikanirangko nipilna gita ta·raken tom·aniko ong·atchina aro ia songgigrikanirangko chu·sokatna gita kamrangko a·bachengatchina gital bikotgipa dol, a·dokni Chief Minister-ko didiataha.
ANVC dolrang baksa songgigrikanioni dingtange, ADC-rangko chalaianio maming niamrangko dingtangatjachina didiatengon, iandake ADC-rangko chalaianio maiba kamrangko dingtangatgenchimode ian Garo Accord-ko pe·ani gita ong·gen ine ANVC aro ANVC-B dolrangni gital bikotgipa ‘Unified Group of Garo Accord Signatories’ parakataha.