Sak 445-na appointment letter-rangko on·a
SHILLONG: Meghalaya sorkari Butbar salo, Mawdiangdiang-o skanggipa changna Rozgar Mela-ko ong·atgipao Civil Defence aro Home Guards Department-na gital rimnapako man·gipa sak 445 sipairangna appointment letter-rangko on·angaha.
Civil Defence aro Home Guards Minister Comingone Ymbon, rimnapgital Sub-Inspector-rangna, Guardsman-rangna, Driver-rangna aro Non-Combatant Staff-rangna appointment letter-rangko on·angaha.
Ymbon gital rimnapako man·giparangna nama skaniko on·ana baksana an·tangtangko on·kange an·tangtangni kamko dangdike on·china gitaba didiaha. Pilak kamon ka·donggipa ong·bo, ong·telaigipa duk mikchini somairango jedake chi bana re·anirango, banggrianirango aro balmandurirango a·dokni aro a·songni manderangna an·tangtangko on·kange dangdike on·na ka·donggipa ong·bo ineba didiaha.
Gimikchide sak 22,000-na baten kamna dorgasto galgiparang dongachim. Uamangko Physical test aro Written Test, uni ja·man Interview-rangko ra·e seokanio chu·gimik sak 445-kosan kamo rimnapaha ine Civil Defence aro Home Guards Secretary Vijay Kumar Mantri aganaha.
Re·baenggipa jao dingtang dake sak 233 personnel-rangko rimnapangtaigen. Border Wing Home Guards Battalion-oniko State Disaster Response Force (SDRF)-ona dakatskana a·dok sorkarina on·manaha ine Civil Defence Director M.K. Sangma aganangskaaha.
Indake da·o gital sipairangko rimnapanichi, a·doko duk a·selrangni somaio naljokatgipa dolrangko bilakbatatna ka·dongsoenga ine Official-rang parakaha.