SHILLONG: East Garo Hills a·jani headquarter Williamnagar jillao, mande sakbongana tol·e tarigipa Scheduled Tribe (ST) certificate-rangko on·ahani gimin Common Service Centre (CSC)-o kam ka·enggipa mande saksako rim·aha.
Official-ni u·iatani gitade, Williamnagar-ni Deputy Commissioner (DC) office-o Aadhar-na biming segatgipa mande saksa, tol·e tarigipa ST certificate-ko on·ani ja·man iani bidingo ma·sina man·aha.
Certificate-ko scan ka·engmiting somoio certificate-o donggipa QR code ra·chakjahani a·selsa iako rim·na man·aha ineba official parakataha.
Rongsak-o CSC-ko chalaienggipa mande, maming niam gri, ST certificate-rangko on·aha ineba official aganaha.
Indake ong·engon, CSC-rang, cyber café-rang ba uandakgipa internet dokkanrango Scheduled Tribe/Scheduled Caste, income, residential ba je official certificate-koba iandake tol·e manderangna on·genchimode rakgipa sastirangko man·gen ine East Garo Hills a·jani District Administration, mikrakataniko on·ataha.
CSC-rangara, internet-rangchi, sorkarini kamrangko manderangna dangdike on·na kuligipa centre-rangsa ong·achim ine nikna man·a.