SHILLONG: Assam a·doko niam gri songdong a·chaenggipa manderangko Assam sorkari a·rikgalengon, Meghalaya a·dokona maming lekka pancha gri re·napbaenggipa manderangko Hynniewtrep Youth Council (HYC)-ni membor-rang, Byrnihat aro Ratacherra-o donggipa infiltration check gate-rangko nitimsoenba, sak 900-na baten niam gri re·napbaenggipa manderangko rim·e watpilatna man·aha ine u·iataha.
HYC-ni president Roy Kupar Synrem-ni kobor ra·timgipa manderangna u·iatani gitade, Assam a·doko niam gri songdongenggipa manderangko Assam sorkari a·rikgalengani gimin a·rikgalako man·gipa manderang Meghalaya a·doko katnapna jotton ka·skaenga aro iandake niam gri re·napbaenggipa manderangko uamang nitimsoenba, biaptangtangona watpilataha.
Meghalaya a·doko niam gri napsrukbaenggipa manderangko champengsona rakgipa niamrang dongjani a·sel gipin biaprangoni manderang, altuaen Meghalaya a·dokona re·napbae kamrangko ka·e cha·na aro songdong a·chajolna cholrangko ra·enga ineba Synrem aganaha.
Assam a·doko a·rikgalako man·gipa manderang, Meghalaya a·doko katnapna jotton ka·skagen ine ma·sisoenba, re·anggipa August 14 tarikonin uamang biap damgnio, a·dokona re·napbaenggipa manderangko nitimsoenba, sak 900-na baten manderangko rim·e watatpilna man·aha ineba HYC-ni president parakataha.
Salgro salaramni Manipur, Mizoram aro Nagaland a·dokrangode gipin biaprangoni napsrukbaenggipa manderangko champengna Inner Line Permit (ILP) gita dakgipa niamrang donga indiba Meghalaya a·dokode ILP aro uandake bilakgipa niamrang dongkujani gimin manderang altuaen napsrukbana man·enga ineba ua aganaha.
“Chingni ia biap damgnio nitimengmiting somoio badita sak manderangan ia biapko gele, gipin biaprang gita Meghalaya a·dokona re·napbaenggen, iasa sing·anide,” ine Synrem aganenba, mande saksaan East Jaintia Hills a·jao 2026 bilsini August 31 tarikona kingking labour registration-ko man·engani gimin Meghalaya Identification, Registration of Migrant Workers Act 2020-ko ra·gatanichiba kam ong·brejaenga ine matnangataha.
Gipin biaprangoni manderang, an·tangtangko India-o songdongkamgiparang ine mesokna maming lekka grian, labour registration card-na acknowledgement slip-ni a·dokona re·napbana jotton ka·enga ine janapatskaengon, iandakgipa manderangko da·onin champengjagenchimode mikkangchi a·songni dingtang dingtang biaprangoni aro gipin a·songrangoniba bang·en Meghalaya a·dokona re·napbae songdong a·chana man·tokgnok ine HYC president mikrakataniko on·angaha.