Bobil dolrangko bon·ata gitan pekatgipa samrangko warachakanioba chu·sokgen: Paul Lyngdoh
SHILLONG: Meghalaya a·doko drugs ba pekatgipa sam jakkalaniko aro badingsrukaniko champengna kam ka·anio chu·sokgipa ong·enga ine Meghalaya Police-ni Anti Narcotic Task Force (ANTF)-ko Bristibar salo a·dok sorkari mittelpilangenba, skango jekai army-rangni dakchakani grian a·doko bobil dake chakatgipa dolrangko a·dokni police dolrang bon·atna man·ahachim, apsan daken da·o drugs jakkalani aro badingsrukanikoba bon·atna man·gen ine parakataha.
A·doko kror 400-na batgipa samrangko rim·na man·aniara, pekatgipa samrangko warachakanio chu·sokgipa ong·aniko mesokanian ong·enga ine janapatengon, “Ian an·chingo police dolrangni kam changani, bil dongani aro ia neng·nikaniko namatna skani gnang kam ka·aniko mesokani ong·enga,” ine Bristibar salo, a·dokni Social Welfare Minister Paul Lyngdoh aganaha.
Pekatgipa sam jakkalani aro badingsrukaniko warachakaniara ‘an·tangtangan so·otako man·ani ba gipin so·otani’ gita ong·enga ine toe janapatengon, “Drugs-ko warachakanio an·ching amako man·genma chegipa ong·gen? Anga bebera·a, ia dakgrikanio Meghalaya chegipa ong·gen,” ine Lyngdoh aganaha.
Meghalaya a·dokba police department-mangmangni kamko ka·anichi, bobil dolrangko bon·atna man·gipa a·dokrangoni damsa ong·a ineba ua a·dokni police-rango ka·dongchakenganiko parakataha.
“Gipin a·dokrang army-rangko okamatna nangahaoba an·chingde okamatna nangjaha. Nagaland, Mizoram, Punjab, Assam aro maoist naxalite jolrangoba army-rangko okamna nangaha. Meghalaya a·dokde bobil dolrangko bon·atanio army-rangni dakchakani gri police dolrangchin chu·sokgipa ong·aha,” ine Lyngdoh aganaha.
Meghalaya a·doko songdongenggipa manderangoni 65 percent-de bilsi 35-ni ning·o ong·giparangsa ong·ani gimin chadamberang ong·gija ramarango dilsretako man·jana gita chadamberangna tangka paisarangko koros ka·na nangengani giminba Social Welfare Minister janapataha.
ANTF-ni on·gipa memorandum-ko Drug Reduction, Elimination, and Action Mission (DREAM) project-ni tangka paisarangko on·e chu·sokatgen ineba ua ku·rachakaniko on·angaha.
DREAM project-ni dingtang dingtang daitorangko talate on·angengon, pekatgipa sam jakkalani aro badingsrukaniko champenganio dingtang dingtang gadangrango kamko ka·na nangengani gimin ia kamo dingtang dingtang department-rang, jekai home police, social welfare, education, health, aro law department-rang nangrime kamrangko ka·enga ine Social Welfare Minister parakataha.
Meghalaya a·dokara gipin a·dokrang baksa nangchapgipa ong·e drugs badingsrukaniko champenganio neng·nikanirangko chagrongna nangengoba ANTF-ni ka·dongbee kamko ka·engani gimin ua mittelpilaniko parakangaha.
A·doko drugs jakkalaniko bon·atna sorkarini ka·enggipa kamrangko mitam manderangni matnanganirangna aganchakaniko on·angengon, “Chokkio asongari matnange rona aro a·dokni neng·nikanirangko namatna cholrangko aganade namen altubea indiba mikkango donge kamko ka·dilna aro kamko ka·e mesoknade ka·donganiko nanga,” ine Lyngdoh parakataha.