TURA: Garo Hills Autonomous District Council (GHADC)-o kam ka·enggiparangna ja 43-ni dormaharangko on·na man·kujaengani gimin aro Tura Medical College-ko Public-Private Partnership (PPP) mode-o chalaina tik ka·engani gimin jegale Garo Hills-ni dolbonga Civil Society Organisation (CSO)-rang, chong·motan A·chik Youth Welfare Organization (AYWO), Federation of Khasi Jaintia & Garo People (FKJGP), Garo Students’ Union (GSU), Association for Democracy and Empowerment (ADE) aro Federation for A·chik Freedom (FAF) dolrang, jingjengatanirangko dakna a·bachengataha.
GHADC-o ong·enggipa obostarangni bidingo janapatengon, “GHADC-o kam ka·enggiparang ja 43-ni dormaharangko man·kujaengani gimin Non-Gazetted Employees Association (NGEA)-ni jingjengatanio chingaba bakrimaniko on·paenga maina Meghalaya a·doko songdongenggipa Tribal-rangko chel·chakna gitasa Gopinath Bordoloi aro JJM Nichols Roy, Indian Constitution-ni Sixth Schedule-ko tariahachim. Indiba GHADC-ko chalaidilgiparangni skatang tangka paisarangko jakkalani a·sel aro niamrangko name ja·rikjani a·sel da·alo GHADC-ko chlaianio iandakgipa obostarangko chagrongna nangengaha,” ine dolbonga CSO-rang parakataha.
Tura Medical College-ko private company baksa nangrime chalaina tik ka·engani gimin a·dok sorkariko jegalatskaengon, “Tura Medical College & Hospital (TMCH)-ara ma·mong sorkarini baksku aro a·dok sorkarini baksa dake tangka chame on·gipa ma·mongni scheme-sa ong·a aro ian Garo Hills-o sanna banani kamrangko nambatatna aro medical porainagipa chatro chatrirangna cholko on·enggipasa ong·a. Indiba ia TMCH-ko PPP mode-o private company-chi chalaina sorkarini tik ka·aniara Garo Hills-ni manderangna on·enggipa namgnirangko ra·seka gita ong·enga aro iako chinga raken jegalenga,” ine dolbonga CSO-rang parakataha.
Assam a·dokni sorkari medical college-rangode 85% seat-rangko joltangni chatro chatrirangnan chamgenchimoba Tura Medical College-ode 50% seat-rangkosan joltangni chatro chatrirangna chamskaenga ine a·dok sorkariko matnangatengon, “Tura Medical College-ko kulianichi an·tangtangni dedrangba medical-ko poraianio nambata cholrangko man·pagen aro nambata sanna bananirangko man·gen ine ka·dongesa joltangni manderang, a·arangko jaksrambee on·giltokaha. Uamang, gam-jinrangna mikpakma nie ia a·arangko on·gila ong·ja indiba sorkario ka·dongesa on·giltokaha,” ine CSO-rang parakataha.
Bristibar saloni a·bachenge, August-ni 23 tarikona ia dolbonga CSO-rang, NGEA-ni jingjengatanio bak ra·e, ia minggninan Garo Hills gimikon poster campaign-chi jingjengataniko a·bachengataha ineba u·iataha.
NGEA baksa bakrimaniko mesokna aro TMCH-ko PPP mode-o chalaina tik ka·aniko jegale, re·baenggipa August-ni 25 tarik Sombar salni 12:00 bajioni attam 2:00 bajiona kontagnina, Garo Hills gimikon dokkanrangko chipe donchina gitaba ia dolbonga CSO-rang didiataha.
“Ian chingni jingjengataniko a·bachengani ong·enga aro chingni dabianirangko ta·raken chu·sokatchina chinga dabienga. Ia dabianiko knachakjagenchimode chinga rakbata ja·kurangko de·e jingjengatanggen,” ine Garo Hills-ni dolbonga CSO-rang mikrakataniko on·angaha.