SHILLONG: Madhya Pradesh a·doko bading chiwale cha·gipa Raja Raghuvanshi-ko Sohra jolo so·ote galanina matnangako man·enggipa Sonam Raghuvanshi, Raj Kushwaha aro gipin manderangni kosako a·dokni police-rang, ia August jani bon·angachibara chargesheet ka·gnok ine u·iataha.
Raja Raghuvanshi-ko so·otanina matnanga man·enggipa pilak manderangkon re·anggipa August 14 tariko, Shillong-ni District Court-o mikkangpaatahachim aro ia manderangko police-rangni ning·o donkuchina bi·ahani gimin kachari, police-rangni bi·aniko knachakaha.
Bristibar salo, Additional Public Prosecutor Tushar Chandra-ni kobor ra·timgiparangna u·iatani gitade, ia a·selni bidingo sandirokenggipa Investigation Officer, matnanga man·gipa manderangni kosako ia August jani bon·angao ong·jaode September jani skanggipa antio chargesheet ka·gnok.
Raja Raghuvanshi-ko uni jiktangni jakchi aro gipinrangni jakchi so·otaniko sandirokanirang da·o matchotna siengaha ine janapatengon, matnanga man·gipa manderang pilakkon re·baenggipa August-ni 27 ba 28 tariko, kachario mikkangpaattaigen ine Chandra parakataha.
Raja Raghuvanshi-ko so·otanina police-rang, da·o dipet gimik sakchet manderangko rim·ahachim aro uamangara, Sonam Raghuvanshi, Raj Kushwaha, Akash Rajput, Anand Kurmi, Vishal Chauhan, Shilom James, Balbir Ahirbar aro Sonam-ni dongnuchakgipa nokni nokgipa Lokendra Singh Tomar ong·achim.
Shilom James, Balbir Ahirbar aro Lokendra Singh Tomar-nade kachari, jaminko on·skaaha.
Indore songjinmaoni bia ka·daldale re·bagipa Raja Raghuvanshi aro Sonam-ni gimaangaoni salchetni ja·man June 2 tariko Raja-ni sogimin manggisiko, Sohra jolo donggipa Wei Sawdong Falls sambaoniko man·ahachim. Raja-ni manggisiko man·ani ja·man Meghalaya Police, SIT-ko songe, ia a·selni bidingo sandirokna a·bachengaha aro ia mandeko so·otanina uni jikgipa Sonam, uni mikchagipa Raj Kushwaha aro uamangni so·otna tik ka·gipa mande sakgittamko rim·na man·aha.