Resubelpara: Union Minister of State for Home Affairs, Bandi Sanjay Kumar, North Garo HIlls district-ni officer-rang baksa online gita tom·aniko dakangaon district-o ma·mong sorkarini scheme-rangko ra·gatanio chagrongenggipa neng·nikarangni bidingo chanchirimangaha.
Sonibar salo video conference gita tom·aniko ong·atangaon ma·mong sorkarini scheme-rangko district-o ra·gatani bidingrango agangrikangaha. Mikkangchi maikai nambate kamrangko ka·angna man·gen iarangni giminba chanchirimaha.
North Garo Hills-ni Deputy Commissioner Dr Abhishek Saini, Union Minister of State Bandi Sanjay Kumar-na district-o scheme-rangko ra·gatna kamrangko ka·anio maidakgipa neng·nikarangko man·enga uarangko u·iate on·aha. Mitam project-rangko ka·na gita infrastructure-ni gita neng·nikako chagrongani giminba u·iataha.
Indake Deputy Commissioner Dr Abhishek Saini, dingtang dingtang department-rango nambate kamrangko ka·angna man·a gita tangka paisako on·china mol·molaha. Jedakode scheme-rangko nambate ra·gatna man·gen.
Tom·anio district-ni officer-rang presentation-ko mesokangaon department-tangtangni chagrongenggipa neng·nikarangko janape mita scheme-rangko jolna kragipa ong·na gita scheme policy-rangko taridapchina agan-ku·pattiaha.
Uandake officer-rang baksa adita chanchirma ja·man Union Minister of State for Home Affaris Bandi Sanjay Kumar, district-ni officer-rangni janapgipa kattarangko name dake niatgen aro scheme-rangko nambate ra·gatna man·a gita cholrangko mesoke on·na ka·dongataha.
Tom·anio Health, PHE, DCIC, Horticulture-Agriculture, Soil & Water Conservation, Education, Labour, PWD(Roads), C&RD (MNREGS) aro Social Welfare department-ni scheme-rangkoba nipilangaha.
