SHILLONG: Garo Hills Autonomous District Council (GHADC)-ko man·chape a·dokni damgittam Autonomous District Council (ADC)-rango kam ka·enggiparangna November ja dipet a·dok sorkari, dormaharangko on·gnok ine adita salrangna skang a·dokni Chief Minister Conrad K Sangma-ni parakataniko Garo Hills-o dingtang dingtang dolrang jegalatani ja·man Khasi Hills-oba a·dok sorkarini iandake ja·ku de·na tik ka·aniko Hynniewtrep Youth Council (HYC) aro Khun Hynniewtrep National Awakening Movement (KHNAM) dolrangba jegalataha.
ADC-rango kam ka·giparangna a·dok sorkarini dormaha on·na tik ka·aniko jegalatengon, re·baenggipa bilsion GHADC election-ko ong·atna am·engani giminsa ian National People’s Party (NPP)-chi dilenggipa Meghalaya Democratic Alliance (MDA) sorkarini, ‘politics kal·ani’ gita ong·enga ine HYC parakataha.
HYC-ni dilgipa Roy Kupar Synrem-ni parakatani gitade, ADC-rangara kajinarangko ra·na, a·ningni ma·manti gamrang, gari gorarang aro professional tax-rangni kajinarangonikoba bak man·pana bilrangko man·ani gimin ia cholrangchin kam ka·giparangna dormaharangkoba on·na man·aiachim.
ADC-rangna iandake a·dok sorkari, tangka paisarangko on·e dakchakgenchimode, a·dok sorkarioniko man·soenggipa tangka paisarangko hisap rakkina nange, ian ADC-rangna on·gimin bilrangko aro jakgitelgipa bimangrangko chalaiani on·gimin bilrangko bon·atani gita ong·gnok ine HYC-ni president parakataha.
Iandake sorkarini dakchake on·anirangko nangjana gita ADC-rang, tangka paisa koros ka·ako komiatna nanga aro kam ka·giparangko skatang rakkina nangja ineba Synrem, ku·pattianiko on·ataha.
ADC-rango kam ka·giparangna sorkarini dormaha on·na tik ka·aniko KHNAM dolba jegalatengon, a·dok sorkari skangonin tangka paisani gita neng·nikanirangko man·enga ong·ode maikai ia damgittam ADC-rango kam ka·giparangna dormaharangko on·na miksongenga ine sing·doataha.
Iandake ADC-rango kam ka·giparangna dormaharangko on·anichi a·dok sorkari, kam ka·giparangni service rule-rangko jako ra·skana miksongengama ineba KHNAM dolni dilgiparang sing·doataha.
GHADC-o kam ka·enggiparang, ja 43-ni dormaharangko man·kujaengani gimin kamrangko dontongate jingjengatengon, uamangni man·na nangkuenggipa dormahani giminde maming ku·rachakanirangko on·gija, mikkangchi jaanti on·na sienggipa dormahani giminsa Chief Minister parakatskaaha ine iana skang, Tura-ni MDC aro BJP-ni state vice president Bernard N Marak-ba jegalatahachim.
GHADC-o kam ka·enggipa manderangni dabie jingjengataniara, jaanti dormahako on·china dabie jingjengatani ong·ja indiba NPP-chi chalaienggipa Executive Committee-ni bangki dongenggipa ja 43-ni dormaharangko on·china dabianisa ong·enga ine talataniko on·angengon, GHADC-o kam ka·giparangna ja 43-ni dormaharangko matchote on·ani ja·mansa November ja dipet jaantini dormahako sorkarini on·na miksongenganikode parakna nangachim ine Marak aganaha.