TURA: A·chik Literature Society (ALS), North Eastern Hill University (NEHU) Tura Campus-ni Garo Department aro Tura Don Bosco College-ni Garo Department baksa nangrime, adita salrangna skang, Regional Writers Meet 2025-ko Tura-ni Christian Girls Higher Secondary School-o ong·atangaha.
Ia Regional Writers Meet-ko ong·atanio, North-Eastern Hill University, Tura Campus, University of Science & Technology, Baridua, Ri-Bhoi District, Don Bosco College, Tura, Don Bosco College Higher Secondary Section, Tura, Don Bosco School, Tura, Tura Government College, Durama College, Tura, Tura Christian College, Tura, Miriam Russel College, Tura, Mason –Phillips College, Tura, Redemption College, Tura, Mendipathar College, North Garo Hills, Loyola College, Williamnagar aro Ampati Degree College, South-West Garo Hills-oni chatro chatrirangba bak ra·angtokaha.
Ia Writers Meet-ko ong·atanio dingtang dingtang manderang aro chatro chatrirang, ming 100 peodorang, kan·dikgipa golporang aro gipin seanirangko, jinmana poraiatan baksana mesoke on·angtokaha.
Ia Regional Writers Meet-ko a·bachengatanio, Rev Dr Wetterfield R Marak-ba dongpae jinmana aganprakangengon, A·chikkuko name skie ra·na nangchongmotani gimin aganangenba, gipin ku·sikrangkoba skie ra·china chatro chatrirangko didiangaha.
Ia tom·anio, A·chik Literature Society-ni president Prof Caroline R Marak-ba jinmana aganprakengon, gisik a·ning bite aro an·tangtangko on·kange, sea jotanirangko dakchina, sea jotanio gisik nanggipa manderangko didiangaha.
Ia Regional Writers Meet-ko ong·atanio, ICFAI University Tura-ni gitcham Adviser Viola Sonachi B Sangma-ni A·chikkuchi segipa ‘Chasong Gitalni Criticism’ ki·tapkoba oprake on·angjolaha.
Ia tom·aniko ong·atanio, Williamnagar College-ni Assistant Professor Dr Bilnang K Sangma aro saksa ki·tap serakgipa Kroshnil D Sangma-ba, chatro chatrirangna aro sea jotanio gisik nanggipa manderangna agan-ku·pattianirangko on·angaha.
