TURA: Adita salrangna skang, Post Graduate Students Union (PGSU)-ni vice president Chakram D Sangma aro Confederation of Meghalaya Social Organisations (COMSO)-ni advisor Cherian Momin, High Court-ni ukil Tengku M Marak baksa, Meghalaya a·dokni Governor CH Vijayashankar-ko grongenba, Garo Hills-o ong·enggipa obostarangni gimin agangrikangaha.
A·dokni Governor-ko gronganio ia sakgittam dilgiparang, Garo Hills Autonomous District Council (GHADC)-o kam ka·enggiparangna ja 43-ni dormaharangko on·kujaengani a·sel neng·nikanirangko chagrongna nangtokengani gimin agangrikangenba, ia neng·nikanirangko namatna gita dakchakaniko on·china mol·molangaha.
Garo Customary Law (GCL)-ni bidingo agangrikangengon, A·chikrangni daka rikanirangko chel·chakna man·na gita ia niamko mangrakbatatna nangengani gimin ia sakgittam dilgiparang, Governor-ko didiangaha.
Una agreba, Mendipathar College-o ong·enggipa obostani bidingo, Indo-Bangla simako kapengani bidingo aro North Eastern Hill University (NEHU) Tura Campus-na tangka paisarangko chamatani bidingoba ia dilgiparang, a·dokni Governor baksa agangrikangaha.
Ia pilak neng·nikanirangkon niatna gita a·dokni Governor ku·rachakaniko on·ataha ine ia sakgittam dilgiparang u·iataha.
An·tangko grongna cholko on·ahani giminba uamang, a·dokni Governor-ko mittelpilataha.