Pa Sonaram Sangmani sianiko Tura-oba gisik ra·anga
BOKO/TURA: A·chikrangoni skanggipa political dilgipa aro A·chikrangni jakgitelanina krengdilgipa Pa Sonaram R Sangma-ni chang 109-gipa siani salko August-ni 27 tarik Budbar salo, Sonaram Memorial Trust Society aro Garo Students Union (GSU) Assam State Zone (ASZ) nangrimemba, Assam Goalpara a·jani ning·o donggipa Bakrapur songo maniangaha.
Pa Sonaram Sangma-ni siani salko pangna bilsian Sonaram Memorial Trust Society, GSU ASZ baksa nangrimenba, Bakrapur songo manidilrongenga aro uandaken ia changoba uni siani salko dingtangmancha program-ko ong·atenba apsan biapon maniangtaiaha.
Pa Sonaram R Sangma A·chikrangni gisepo skanggipa politics-ni kamko ka·dilchenggipa aro an·chi pari nika gri British sorkarini kosako dakgrikdilchenggipa ong·achim. Ua da·ororoni manderang gita skia man·begipa mande ong·pajaoba namen ka·donggipa aro an·tangni bebera·anio mogija kim·kimgipa ong·achim. Ua A·chik jatko gipin jatrangni sinchep dokchep dakanirangko nike A·chik jatko chel·chakna gita an·tangko on·kange kamko ka·aha aro uandaken ua 1899 bilsimango jatna aro a·songtangna kamko ka·chakataha.
Pa Sonaram Sangma, 1916 bilsini August 27 tariko, be·enni gita saaniko man·e Bakrapur songon a·gilsakko wate re·angaha.
Ia salko manianio, Assam a·dokni Education Minister aro Plain Tribes & Backward Classes Welfare Minister Manoj Pegu, mongsonggipa sokgipa ong·e bak ra·angaha aro Pa Sonaram R Sangma sagina, pulrangchi mande ra·pilskaaniko dakangaha. Pa Sonaram Sangma-ko gisik ra·na gita Assam-ni Tribal Welfare Department-ni gong kror 1 tangkarangko dakchake on·anichi rikna sienggipa auditorium-naba ia salni bako Assam Minister-ni jakchi pangchakaniko songe on·angjolaha.
Iana skang, dingtang dingtang dilgiparang aro ia salko manianio bak ra·na re·bagipa pilakan, Bakrapur songo tarie donenggipa Pa Sonaram R Sangma-ni mangkrongona re·ange, pul bibalrangchi una mande ra·pilskaanikoba dakangaha.
Ia salko manianio dongpae bak ra·anggipa gipin manderangara, Assam Legislative Assembly-ni Deputy Speaker Dr Numal Momin, Rabha Hasong Autonomous Council (RHAC)-ni Chief Executive Membor Tankeswar Rabha aro gipinrang ong·a.
A·chik A·songni jakgitelanina dakgrikdilgipa aro skanggipa A·chikrangoni Political dilgipa Pa Sonaram R Samgmani bilsi 109-gipa siani salko gisik ra·na unbaksa A·chik Concious Holisticaly Integrated Krima (ACHIK) Krima Council-ni Foundation Day-ko Manina Butbaro West Garo Hills, Tura District Auditorium-o dingtangmancha program-ko ong·ataha. Indake ia program-ko ACHIK Event Management Society-ni gita ong·atangaha. Ia program-ona Dr. Julius R Marak mongsonggipa ong·e sokbaaha. Unbaksa Rev. I.C Marak, Garo Student Uninion (GSU)-ni President Tengsak G Momin, Sonaram Sangma ni ma·drangrang, Senior Citizen-rang aro ACHIK krima Council-ni dingtang dingtang Unit-rangoni dilgiparangan re·bae bak ra·angaha.
Tom·anio mongsonggipa sokgipa Dr. Julius R Marak, Sonaram R Sangmani gimin aganangengon, A·chik A·songko British-rang 1872 bilsio bon·kame sason ka·na napdraaha unon A·chik jatni warachakgipa Pa Togan Nengminja, Gilsang Dalbot Shira mang sina nangtokaha. Uandaken Bristish-rang A·chik A·songko begal olate, kajina ra·e uandake dingtang dingtang dake sinjete roaha aro A·chik A·songni nambatgipa biaprangko Forest Reserve dakna am·aha. Indakmiting somaio Pa Sonaram Sangma saksa A·chik jatni dilgipa ong·engachim. Indake Bristish-rangni sinjete roaniko warakchakna ja·ku de·aha. A·chik A·songna, A·chik jatna warachakengon ua pattokrango donatako man·pilaha. Indake ong·genchimoba ua A·chik jat A·songna warachakaniko dontongjaha. Unigimin da·alo ACHIK Krima Council-ni Pa Sonaram Sangmani siani salko gisik ra·ataniara ian gisik ra·na krabegipa ong·a ine jinmana aganaha. Unigimin uni A·chik A·songna dakanggimin kamrang gita apsan dake ja·rikangna man·jaoba A·chik jatna aro A·songna ka·saaniko an·ching ja·rikna man·a. Ku·mongani aro nangrimani dongjaode mamingsaloba jatko re·dilna man·ja. Unigimin ku·monge aro nangrime jatko re·dilangchina ACHIK dolko didiangaha.
GSU-ni President Tengsak G Momin da·o ong·enggipa obostarangni gimin aganangengon, Garo Hills-ni A·chik jatni gamrangko a·dok sorkarisa ra·sekdraengjok, GHADC dongani namgni dongangjaengjok ka·sin ka·sin District Council-ko bon·atna jotton ka·engjok. Unigimin uarangko warachakna A·chik jat ku·monge aro nangrime kam ka·na nangengjok ine aganenba, GHADC-o kam ka·enggiparangni dormahana dabianiko aro Tura Medical College-ko PPP dakna am·ani gimin jegalaniko a·dok sorkari knachakjaode re·baenggipa salrango GSU-nigita champenganirangko ong·atgen, unigimin na·simangba bak ra·pabo ine aganangaha.
A·chik a·songni dilgiparang Civil Society, NGO-rang pilak kamko dakengoba Nokgipa Isol baksa kam ka·china Rev. I.C Marak didiangaha. ACHIK Krima Council-ni Chief Organizer an·tangni ka·rimska pilak dilgiparangkon kakketo aro ku·monge Jatna aro A·songna kam ka·na ine ku·mongani kattarangko aganangaha. Pa Sonram R Sangma-ni kan·dikgipa janggi tanganiko uni ma·drangoni saksa poraie on·angaha. Bon·kame Dr. Julius R Marakna, uni A·chik Jatna jatni dakbewal niam aro niam bidikrangko seachi on·gilanina ACHIK Krima Council una Lifetime Achievement Award-koba on·angaha.