SHILLONG: Meghalaya Board Of School Education (MBOSE)-ni Secondary School Leaving Certificate (SSLC) porikkako ia 2025 bilsini December jao ong·atna gita sorkarini tik ka·aniko dingtang dingtang dolrang jegalatani ja·man, da·o ia SSLC porikkako re·baenggipa 2026 bilsini January jaona ra·doatskana tik ka·angaha.
MBOSE-oni koborko on·ani gitade, a·dok sorkarini u·iatanio pangchake, SSLC porikkako re·baenggipa 2026 bilsio, January jani bon·kamgipa antio ong·atskagen.
Ia porikkani bidingo sorkari, bakan u·iattaigen ineba MBOSE-oni parakataha.
SSLC porikkako January jaona ra·doatna tik ka·ani bidingo talataniko on·angengon, dingtang dingtang dolrang, chatro chatrirang aro skulrang mol·molahani gimin porikkako December jao ong·atgija January jani bon·kamgipa antio ong·atskana tik ka·aha ine a·dokni Education Minister Rakkam A Sangma parakataha.
SSLC porikkani tarikrangko baditaba salrangni gitasan ra·dodapaiaha ineba ua aganaha.
SSLC porikkako ia 2025-26 bilsionin December jao ong·atgnok ine iana skangde a·dok sorkari parakatahachim.
Ia SSLC porikkako December jani gnigipa antion a·bachengatenba, December-ni 19 tarik ba una skangan matchotatna gitaba sorkari tik ka·ahachim.
SSLC porikkako December jao ong·atanichi porikkana kamrangko ka·sona nangenggipa manderang aro chatro chatrirangba neng·nikanirangko chagrongna nangtokenga ine dingtang dingtang dolrang, ia porikkako ong·atrongbaenga gitan January ba February jaon ong·atchina dabiangtokskaahachim.